Н.ЖАРГАЛМАА

Пенсильванийн их сургуулийн ерөнхийлөгч Лиз Мэгилл кампус дахь антисемитизмын (еврейчүүдийн эсрэг үзэл) талаар байр сууриа илэрхийлснийхээ төлөө огцорсон хэмээн бямба гарагт мэдээллэв. Аравдугаар сард эхэлсэн Хамас-Израилийн мөргөлдөөний улмаас коллежийн кампус дахь антисемитизм (еврейчүүдийн эсрэг үзэл) нэмэгдсэн тул өнгөрсөн мягмар гарагт АНУ-ын конгрессын сонсгол зохион байгуулжээ. Сонсголын дараагаар АНУ-ын шилдэг гурван их сургуулийн ерөнхийлөгчид ихээр шүүмжлэлд өртсөн байна.

Харвардын их сургуулийн ерөнхийлөгч Клаудин Гэй, Массачусетсийн технологийн дээд сургуулийн ерөнхийлөгч Салли Корнблют болон Лиз Мэгилл нар сонсголын үеэр Бүгд найрамдах намын төлөөлөгч Элиза Стефаникийн “Еврейчүүдийг хоморголон устгахыг уриалах нь сургуулийнхаа ёс зүйн дүрмийг зөрчих үү” гэх асуултад "тийм" эсвэл "үгүй" гэсэн хариулт өгөхөөс татгалзжээ. Еврей оюутнууд, гэр бүлүүд болон төгсөгчид сургуулиудыг хоморголон устгалын эсрэг чимээгүй байгааг буруутгаж байна. Сонсголын дараагаар тэдний эсрэг огцрохыг шаардсан хүсэлтүүд эрс нэмэгдсэн байна. Лиз Мэгилл харамсаж буйгаа илэрхийлсэн бичлэг нийтэлсэн бол Харвардын их сургуулийн ерөнхийлөгч Клаудин Гэй ч мөн уучлалт гуйжээ.

Пенсильванийн их сургуулийн удирдах зөвлөлийн дарга Скотт Бок сургуулийн дотоод сүлжээнд нийтэлсэн мэдэгдэлдээ “Их сургуулийн түр ерөнхийлөгчийг томилох хүртэл Лиз Мэгилл үүрэгт ажлаа хэвээр үргэлжлүүлэхийг зөвшөөрсөн. Мөн миний бие удирдах зөвлөлийн даргыг суудлаасаа огцрох болсныг мэдэгдэж байна. Лиз Мэгилл Пенсильванийн их сургуулийн ерөнхийлөгчийн албан тушаалаасаа огцрох өргөдлөө сайн дураараа илэрхийлсэн гэдгийг хуваалцаж байна” гэжээ. Тэрбээр ерөнхийлөгчийн үүрэгт ажлаа хүлээлгэн өгсөн ч хуулийн сургуулийн багшаар үлдэхээр болжээ.

Энэхүү мэдэгдлийн дараагаар Бүгд найрамдах намын төлөөлөгч Элиза Стефаник өөрийн цахим сүлжээнд “Энэ бол Америкийн хамгийн нэр хүндтэй дээд боловсролын байгууллагуудад тархсан антисемитизмын ялзралыг арилгахын зөвхөн эхлэл юм" гэж нийтэлжээ. Мөн тэрбээр Харвард болон Массачусетсийн технологийн дээд сургууль (MIT)-ыг үүнтэй ижил арга хэмжээ авах хэрэгтэй гэв.

Америк-Лалын харилцааны зөвлөл Газын зурваст дахин гал нээснээс хойш дэлхий нийтэд антисемитизм болон исламофобиа эрс нэмэгдсэн ба сүүлийн хоёр сарын хугацаанд исламофобиагаас үүдэлтэй хэрэг өнгөрсөн онтой харьцуулахад 172 хувиар өссөн хэмээн мэдээлжээ.

Түүнчлэн Пенсильванийн их сургуулийн оюутан Эйял Якоби сургуулийг антисемитизмд хангалттай хариу үйлдэл үзүүлээгүй хэмээн шүүхэд өгсөн гэдгээ “CNN” агентлагт мэдээлжээ.

Эх сурвалж: “Зууны мэдээ” сонин

2023 ОНЫ АРВАНХОЁРДУГААР САРЫН 11. ДАВАА ГАРАГ. № 246 (7231)