П.АМГАЛАН

УИХ-ын баасан гарагийн (12.1)  хуралдаанаар  Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийн эцсийн хэлэлцүүлгийг хийх товтой байв. Гэвч гишүүдийн  ирц хүрээгүй тул товлосон хугацаанд хэлэлцэж амжилгүй хойшиллоо.

Тус хуулийн төслийн анхны хэлэлцүүлгийг  арваннэгдүгээр сарын 30-ны УИХ-ын хуралдаанаар хийсэн билээ. Тухайн үед УИХ-ын дарга Г.Занданшатар “Монгол Улсын нэгдсэн төсөв батлагдсан. Улсын төсвийн тухай хууль болон Засаг захиргаа нутаг дэвсгэрийн тухай хуулийн дагуу арванхоёрдугаар сарын 5-ны дотор нийслэл, аймгууд төсвөө батлах учиртай. Тийм учраас Түгжрэлийг бууруулах хуулийг төсөв батлагдахаас өмнө батална. Өнөөдөр багтаж, анхны хэлэлцүүлгийг хийнэ. Тийм учраас шуурхай, анхаарч ажиллахыг хүсье” гэсэн юм.  Мөн АН-ын гишүүд ч Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийн эсрэг байр суурьтай байгаагаа илэрхийлсэн. Энэ талаар УИХын гишүүн С.Одонтуяа арваннэгдүгээр сарын 30-ны УИХ-ын хуралдаанаар “Хуулийн төслийн үзэл баримтлалыг дэмжиж байна. Гэхдээ энэ хууль нийслэлтэй холбоотой хоёрхон асуудлыг шийдэж байна. Цаашид асуудал бүр дээр хууль оруулж ирэх юм уу” хэмээн байр сууриа илэрхийлж байв. Харин  УИХ-ын гишүүн Д.Ганбат “Энэ хууль батлагдаад юу өөрчлөгдөх юм. Нөгөө автобусууд чинь хаана байна аа. Одоо ямар өнгийн автобус орж ирэх юм” гэсэн. Тэгвэл  УИХ-ын гишүүн Б.Пүрэвдорж “Энэ хуулиар таксий үйлчилгээ эрхэлж байгаа хүмүүсийг торгох болчихлоо. Хууль тогтоомжийн тухай хуульд аливаа хуулийн зүйл заалт хоёрдмол агуулгагүй байна гэж заасан. Тэгэхээр энэ заалт яаж хэрэгжиж, зохицуулагдах юм” гэдгийг хэлсэн юм.

Ийнхүү гишүүдийн ирц хүрээгүйн улмаас хойшилсон Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийн эцсийн хэлэлцүүлэг энэ долоо хоногт дахин үргэлжлэх нь ээ.

Эх сурвалж:www.polit.mn