Н.Жаргалмаа

БНХАУ, Батлан хамгаалахын сайдын алба эзгүй байгаа энэ үед жил бүр зохион байгуулдаг цэргийн гадаад ажиллагааны хамгийн том форумыг уламжлал ёсоор ням гарагт эхлүүллээ. БНХАУ-ын удирдагчтай “Бүс ба Зам”-ын дээд хэмжээний уулзалтаар ихэд ойр дотно байсан ОХУ энэ форум өндөр ач холбогдол өгч байгаа ажээ. Тодруулбал, ОХУ-ын Батлан хамгаалахын сайд Сергей Шойгу нээлтийн ёслолын анхны илтгэгчээр бичигдэж, хэлэлцэх асуудлаа дэвшүүлэх юм. АНУ-ын Батлан хамгаалах яамнаас Ксанти Каррас тэргүүтэй төлөөлөгчдийг илгээсэн байна.

БНХАУ-ын Батлан хамгаалахын сайд Ли Шанфу авлигын хэргээр шалгагдаж байсан. Өнгөрсөн мягмар гарагт түүнийг албан ёсоор албан тушаалаас нь огцруулсан юм. Энэ удаагийн форумыг Хятадын армийн удирдагчид ахалж байна. Цэргийн салбарт хоёр, гуравдугаарт эрэмбэлэгдсэн Жан Юшя, Хэ Вэйдун нар бямба гарагт Лаос, Монгол, Вьетнамын Батлан хамгаалахын сайд нартай тус тусад нь хоёр талын уулзалт хийсэн гэж Синьхуа агентлаг мэдээллэв. Мөн тус форумд 22 орны Батлан хамгаалахын сайд, 14 цэргийн дарга оролцохоор ирсэн байна. Энэ нь 2006 онд анх зохион байгуулагдсанаас хойшхи хамгийн өндөр үзүүлэлт юм.

Барууны орныхны хувьд БНХАУ-тай харилцах харилцаа төдийлөн сайжраагүй хэвээр байна. Ихэнх орон форумд оролцохоос татгалзаж эсвэл дунд түвшний төлөөлөгчдийг илгээж байгаа ажээ. Тухайлбал, Франц улс цөөн тооны төлөөлөгч илээхээр төлөвлөж байгаа бол НАТО-гийн төлөөлөгчдийг Аюулгүй байдлын бодлогын захирал Вендин Смит ахална гэж НАТО-гийн албаны хүн мэдэгджээ.

Эх сурвалж: www.polit.mn