С.САРУУЛ
БСШУС-ын байнгын хорооны хуралдааны үеэр зарим гишүүд Соёлын сайдын төсвийн зарцуулалттай холбоотой асуудлыг хөндөж, шүүмжлэлтэй хандаж буйгаа хэллээ. Тухайлбал, байнгын хорооны дарга Г.Мөнхцэцэг “Соёлын сайдын багцад бусдаар гүйцэтгүүлсэн ажил үйлчилгээний хураамж 22 тэрбум 620 сая гаруй төгрөг төсөвлөсөн нь өмнөх оныхоос тэрбум гаруй төгрөгөөр нэмэгдсэн гэсэн дүгнэлтийг аудит гаргасан. Энэ мөнгө юунд зарцуулагдсан бэ. Монгол Улсын олон улс дахь сурталчилгааны үндэсний хороо гэж ямар байгууллага байдаг вэ. Хоёрдугаарт, Соёлын сайдын багцад төв номын сангийн барилга гэж их олон жил үргэлжилж байна. Үндсэндээ найман жил ярьж байна. Өнгөрсөн жил 90 хувьтай явж байгаа гэсэн. Хэдэн жил 90 хувьтай явах юм бол. Байшин боссон. Доторх тоног төхөөрөмж нь дутуу гэсэн. Өнгөрсөн жил нэлээн маргаан дагуулж байж 3.8 тэрбум төгрөгийн хөрөнгө оруулалт хийгдсэн байх ёстой. Хэзээ ашиглалтад оруулж хүлээлгэж өгөх вэ” гэв. Мөн хүүхдүүдэд зориулсан монгол өв соёлыг түгээн дэлгэрүүлэх ямар контент гаргасан вэ, энэ жил хичнээн төгрөг төсөвт суусан бэ, Соёл урлагийг дэмжих сангаас 2023 онд 19 төсөл арга хэмжээнд 651 сая төгрөг олгосон байна. 2024 онд 3 тэрбумын төслийн санал хүргүүлснээс 800 сая төгрөг тавигдсан байна. Эдгээр хөрөнгөөр ямар төсөл арга хэмжээ хэрэгжүүлсэн бэ гэдгийг байнгын хорооны гишүүд хөндлөө.
Эх сурвалж: www.polit.mn