Монголын үндэсний допингийн эсрэг байгууллага цаг үеийн асуудлаар мэдэгдэл гаргалаа. Мэдэгдэлд, олон нийтийн анхаарлыг татаад байгаа Үндэсний бөхийн допингийн шинжилгээний асуудал болон хэд хэдэн ноцтой баримтуудыг дэлгэжээ.
Монголын үндэсний допингийн эсрэг байгууллага нь Монгол Улсын баталсан Олон улсын хууль, Конвенц, Коде, Дэлхийн допингийн эсрэг агентлагийн удирдамж, зөвлөмжийн дагуу үүргээ хэрэгжүүлэн ажиллаж байгаа билээ. Гэтэл уг байгууллага болон түүний удирдлагатай холбоотой баримтыг мушгин гуйвуулсан, нэг талыг барьсан, гүтгэж доромжилсон мэдээллийг хэсэг бүлэг хүмүүс цахим орчинд зохион байгуулалттайгаар түгээж байгаа учраас ийнхүү байр сууриа илэрхийлж буйгаа мэдэгдсэн байна.
Үндэсний баяр наадмын тухай хуульд бөхчүүдээс сэргээшийн шинжилгээ авахаар заасан учраас үндэсний бөхийн тамирчдад Олимп, ДАШТ болон олон улсын хэмжээний уралдаанд оролцож буй тамирчдад тавигддаг дэлхийн стандартын дагуу допингийн шинжилгээ хийгдэж байгаа. Шинжилгээ авахаас эхлээд хариуг мэдээлэх хүртэлх үйл ажиллагаа нь Олон улсын стандартын дагуу хийгддэг бөгөөд бөхчүүдийн шинжилгээний сорьцыг аваад олон улсын итгэмжлэгдсэн лаборатори руу илгээх хүртэлх бүхий л процессыг хянадаг ажлын хэсгийн бүрэлдэхүүнд хууль, хяналтын бүх байгууллагуудын төлөөлөл багтдаг. Тиймээс хууль хяналтын байгууллагууд процессыг маш сайн мэдэж байгаа гэдгийг тодотгох нь зүйтэй. Ийм байхад Олон улсын хэмжээнд Конвенц, Коде, дотооддоо УИХ-аар батлан гаргасан хүчин төгөлдөр Үндэсний их баяр наадмын тухай хуулийг хэрэгжүүлж ажилласан Допингийн эсрэг байгууллагыг элдэв зүйлээр хардан гүтгэж, үйл ажиллагааны хараат бус байдалд халдах гэсэн оролдлого, буруу ташаа мэдээллийг олон улсын байгууллагад өгөх зэрэг нь хэрээс хэтэрч байна гэжээ.
Эх сурвалж:www.polit.mn