П.АМГАЛАН

Монгол Улсын сайд, Боомтын сэргэлтийн Үндэсний хорооны дарга Б.Тулга БНХАУ-ын Бээжин хот, ӨМӨЗО, Ганьсу мужид албан ёсны айлчлал хийж, холбогдох байгууллагын төлөөллүүдтэй уулзлаа.  Уг айлчлал нь хоёр орны Ерөнхийлөгчийн 2022 онд хийсэн уулзалтын үеэр тохирсон худалдааны эргэлтийг 20 тэрбум ам.долларт хүргэх зорилтыг хэрэгжүүлэхэд боомтын үүрэг, чадавхыг нэмэгдүүлэх зорилготой аж. Боомтын сэргэлтийн Үндэсний хорооны дарга Б.Тулга уулзалтын үеэр хоёр улсын хилийн боомтын нэвтрүүлэх чадварыг өргөжүүлэх, бүтээн байгуулалтын төслүүдийг уялдаатай төлөвлөх, санхүүжилтийг шийдэх боломжийн талаар ярилцсан байна. Тодруулбал, талууд Монгол, Орос, Хятад гурван улсын эдийн засгийн коридорын Монгол, Хятад талын чухал зангилаа болох Замын-Үүд-Эрээн боомтын ажиллах цагийн хуваарийг 24 цагаар туршилтаар ажиллуулах шийдвэрт хүрчээ. Боомтын нэвтрэх чадварыг нэмэгдүүлэхээр зарим боомтын цагийн хуваарийг уртасгах асуудлаар хятадын талтай ийнхүү хэлэлцэж тохирсон нь Монгол, Орос, Хятад гурван улсын худалдааны эргэлтийг эрчимжүүлэх, боомтуудаар нэвтрүүлэх ачаа барааны урсгалыг нэмэхэд чухал шийдвэр болсныг Боомтын сэргэлтийн үндэсний хорооноос мэдээллээ. 

Эх сурвалж:www.polit.mn