П.АМГАЛАН

Монгол Улсын Засгийн газраас аялал жуулчлалын салбарыг эдийн засгийн тэргүүлэх чиглэл болгож, агаарын тээврийн либералчлалыг эхлүүлсэн. Уг арга хэмжээний хүрээнд ”Аэро Монголиа” ХХК БНСУ-ын Инчеон олон улсын буудалд УБ-СӨҮЛ-УБ чиглэлд, анх удаа байнгын нислэгтэй болсноо олон нийтэд зарлалаа. Нээлтийн арга хэмжээнд Монголын талаас БОАЖ-ын Сайдын зөвлөх О.Одбаяр, ИНЕГ-ын дарга Ч.Мөнхтуяа, Моннис группийн Ерөнхийлөгч Б.Чулуунбаатар, Аэро Монголиа ХХК-ны Санхүү эрхэлсэн захирал Г.Мөнхбаатар, ЗТХЯ-ны холбогдох албан тушаалтнууд, БНСУ-ын талаас Инчеон олон Улсын нисэх буудлын орлогч дарга Ким Бом Ху болон албаны хүмүүс оролцлоо.

“Аэро Монголиа” ХХК 2001 онд үүсгэн байгуулагдсан. Одоогийн байдлаар Бразил улсад үйлдвэрлэгдсэн 50 хүний суудалтай хоёр агаарын хөлөг, Европын Холбооны улсуудад үйлдвэрлэгдсэн 141 хүний суудалтай нэг Airbus A319 агаарын хөлөгөөр Япон улсын Токио хот, Вьетнам Улсын Хануй хот, БНСУ-ын Сөүл хот болон орон нутгийн нислэг үйлдэж байна.  Түүнчлэн энэ сард хоёр дахь А319 хөлгийг авчрахаар ажиллаж байгаа бөгөөд УБ-СӨҮЛ-УБ чиглэлд долоо хоногт долоо удаа нислэг үйлддэг болохоор төлөвлөж байгаа аж.

Эх сурвалж:www.polit.mn