П.АМГАЛАН
ХХААХҮЯ-ны Төрийн нарийн бичгийн дарга Т.Жамбалцэрэн орон нутагт ажиллах үеэр Төв аймгийн Эрдэнэсант суманд “Буянт төв” ХХК-иас зохион байгуулсан талбайн өдөрлөгт оролцож, тариаланчидтай уулзан санал солилцсон юм.
Үр үржүүлгийн чиглэлээр үйл ажиллагаа явуулдаг “Буянт төв” компани ОХУ-ын Барнаул хотын эрдэм шинжилгээний хүрээлэнгийн “Юнион”, “Лидер 80” улаанбуудайн элит үрийн сортыг энэ хавар тариалж, туршилт хийж байна.
Тус хоёр сортыг тус бүрд нь 100 га-д тарьсан бөгөөд ургалтын нөхцөл байдал, шинж чанар, онцлог, давуу талыг бүс нутгийнхаа тариаланчид, эрдэм шинжилгээний байгууллага, салбар яамны төлөөлөлд танилцуулах өдөрлөгийг тариан талбайдаа зохион байгууллаа.
Энэхүү элит сорт нь богино иштэй, толгой томтой, гурилын шинж чанарыг сайжруулдаг онцлогтой бөгөөд хог ургамал, өвчинд тэсвэртэй, улаанбуудай налах эрсдэлийг үгүй болгох давуу талтайг тус компанийн зөвлөх Ж.Саруул онцолсон юм.
Газар тариалангийн үйлдвэрлэл нь цаг агаарын нөхцөл байдлаас ихээхэн хамаарах болсон энэ цаг үед уур амьсгалын өөрчлөлтөд дасан зохицсон тариалангийн салбарыг хөгжүүлэх зайлшгүй шаардлага бий болж байна. Үүний үндэс нь хөрсөө хамгаалж, үржил шимийг нь сайжруулах, хоёрдугаарт, үр сортын шинэчлэлийг ойр ойрхон хийх байдаг. Тиймээс энэ чиглэлд салбар яам эрдэм шинжилгээний байгууллага, судлаачид, тариаланчидтайгаа хамтран ажиллаж байгааг Төрийн нарийн бичгийн дарга Т.Жамбалцэрэн хэллээ.
Эх сурвалж:www.polit.mn