Б.Нандин

АНУ-ын кино зохиолчдын эрх ашгийг хамгаалдаг WGA байгууллага ажил хаялт зарлахаа өнгөрсөн тавдугаар сард мэдэгдээд байсан бол Холливудын жүжигчид тэдэнтэй нэгдэхээр болжээ. 11500 гишүүнтэй тус байгууллагаас эхлүүлсэн тэмцэлд 160 мянган гаруй уран бүтээлчдийг нэгтгэсэн SAG-AFTRA байгууллага нэгдсэн нь АНУ-ын кино урлагийн салбарт томоохон шуугиан дэгдээгээд байна.

Холливудын жүжигчдийн үйлдвэрчний эвлэл гэж болох SAG-AFTRA байгууллагаас Disney, Netflix, Amazon зэрэг видео стриминг үйлчилгээний компаниудыг төлөөлдөг Alliance of Motion Picture and Television Producers-тэй гэрээгээ сунгахаар өнгөрсөн зургадугаар сараас хэлэлцэж эхэлсэн ч үр дүнд хүрч чадаагүй байна. Тус байгууллагын захирал Duncan Crabtree Ireland "Одоогийн хэрэгжүүлж буй гэрээгээ дуусгаад дараагийн ажил эхлэх боломжгүй” хэмээн хэвлэлийн хурлын үеэр мэдэгджээ. Одоогоор SAG-AFTRA-д жүжигчин, телевизийн хөтлөгч, сэтгүүлч зэрэг 160 мянга гаруй уран бүтээлчид багтдаг бол кино зохиолчдын эрх ашгийг хамгаалдаг WGA байгууллага 11500 гаруй гишүүнтэй аж.

Уран бүтээлчидийн энэхүү тэмцэлд одоогоор Мэрил Стрип, Женнифер Лоренс, Боб Оденкирк зэрэг алдартнууд нэгдэхээр болжээ.

Холливудын жүжигчдийн хувьд хамгийн сүүлд 1980 онд ажил хаялт зохион байгуулж байсан бол зохиолчидтой хамтарсан ажил хаялт 1960 оноос хойш анх удаа болж байгаа нь энэ.

Disney, Comcast, NBCU, Paramount зэрэг томоохон компаниуд сүүлийн хэдэн сард олон сая ам.долларын томоохон алдагдал хүлээх болсон байна. Уламжлалт телевиз үзэгчдийн тоо багасч, кино тасалбарын борлуулалт цар тахлын үеийнхээс ч доогуур хувьтай байгаа нь голлох нөлөө үзүүлжээ.

Эх сурвалж: polit.mn