Б.Нандин

"Их 20-"-ийн санхүүгийн томчууд ирэх долоо хоногт Энэтхэгт чуулах гэж байна. Улс орнуудын Сангийн сайд нар болоод Төв банкны удирдлагууд оролцох энэхүү уулзалтаар олон улсын өрийн бүтэц, криптовалютын зохицуулалтыг шинэчлэх асуудлыг ярилцахаас гадна хөгжиж буй орнуудад олгох зээлийн хэмжээг нэмэгдүүлэх зэргийг хэлэлцэх аж. Мөн хил дамнан үйл ажиллагаа явуулдаг санхүүгийн бүлэглэлүүдэд хэрхэн татвар ногдуулах асуудлыг ч онцгой анхаарч байгаа гэдгийг нэрээ хэлэхийг хүсээгүй Энэтхэгийн Засгийн газрын төлөөлөгч онцолжээ. 

Ялангуяа ядуу буурай орнуудад өрийн дарамтаа зохицуулахад нь туслах, уур амьсгалын өөрчлөлтийг дэмжих санхүүжилтийн эх үүсвэрийг өрөөс чөлөөлөх зэрэг тодорхой асуудлуудыг хэлэлцэх юм байна. Тухайлбал, Замби, Гана зэрэг улс орнууд "Их-20"-ийн зүгээс олгодог зээлийн хөнгөлөлтөд хамрагдах талаар багагүй найдвар тавьж байгаа юм. Учир нь өнгөрсөн дөрөвдүгээр сард эдийн засагч Ларри Саммерс, Н.К.Сингх нарын зөвлөсний дагуу "Их 20" нь зарим буурай улс оронд олгосон зээлийг харж үзэх, удаашралтай байгаа зарим өрийн асуудалд туслалцаа үзүүлэх зэрэг тодорхой зөвлөмжүүдийг хэрэгжүүлэхээр тохиролцжээ.

Энэтхэгийн Гандинарат хотноо хоёр өдөр болох санхүүгийн удирдлагуудын түвшний уулзалт нь ирэх есдүгээр сард Шинэ Дели хотод болох дээд хэмжээний уулзалтын өнгийг тодорхойлно хэмээн “Ройтерс” онцолжээ. 

Уулзалтад одоогоор АНУ-ын Сангийн сайд Йеллен болон Дэлхийн банкны шинэ ерөнхийлөгч Ажиа Банга нар оролцох нь тодорхой байгаа бол БНХАУ, ОХУ-ын төлөөлөгчид оролцоно хэмээн таамаглаж байна гэж Энэтхэгийн албаны эх сурвалж ярьжээ. 

Дашрамд дурдахад, Бүгд Найрамдах Энэтхэг улс "Их 20"-ыг даргалж буй юм.

Эх сурвалж: polit.mn