Б.Нандин

Нидерландын Ерөнхий сайд Марк Рютте албан тушаалаасаа буух болсноо мэдэгдсэн байна. Тус улсын түүхэн дэх хамгийн удаан хугацаанд Засгийн газрын тэргүүнээр ажиллаж байгаа түүний хувьд сүүлийн үед цагаачлалын асуудал багагүй шүүмжлэл дагуулаад байв. Тиймээс Нидерландын улс төрд томоохон сэдэв болоод байгаа орогнол, цагаачлалын асуудлыг бүрэн шийдэж чадаагүй, бусад нам, улс төрийн хүчнийхэнтэй тохиролцоонд хүрч чадаагүй нь Засгийн газар огцрох гол шалтгаан болжээ. “Шинэ кабинет бүрдсэний дараа би улс төрийг орхих болно” хэмээн тэрбээр мэдэгджээ.

Сүүлийн жилүүдэд Нидерландад цагаачлах хүсэлтэй гадны иргэдийн тоо эрс нэмэгдсэн тооцоо бий. Өнгөрсөн жил цагаачлах хүсэлтэй иргэдийн тоо 30 орчим хувиар нэмэгдэж 50 мянгад хүрчээ. Тиймээс цагаачлалын бодлогыг чангатгах шаардлага тулгараад буй. Ерөнхий сайд Марк Рютте Эрх чөлөө, ардчиллын төлөөх ард түмний намын гол удирдагч юм. Тиймээс эрх баригч намын зүгээс тус улсад цагаачлах иргэдийн тоог хязгаарлах бодлого баримталсан нь зөрчил үүсгээд байв.

Нидерландын Ерөнхий сайд Марк Рютте нь 2010 оноос Ерөнхий сайдын албыг хашсан бөгөөд тав дахь бүрэн эрхийн хугацаа нь үргэлжилж байжээ.

Эх сурвалж: polit.mn