Б.Нандин

АНУ-ын ерөнхийлөгч Ж.Байден Литва улсын нийслэл Вильнюст болох НАТО-гийн дээд хэмжээний уулзалтын өмнө Их Британид айлчилж байна. Тэрбээр орон нутгийн цагаар өнгөрсөн даваа гаригт Английн ерөнхий сайд Р.Сунактай уулзаж, уур амьсгалын өөрчлөлтийн эсрэг авах арга хэмжээг эрчимжүүлэх талаар яриа өрнүүлсэн байна. Мөн дэлхий нийтэд тулгараад байгаа улс төр, геополитикийн нөхцөл байдал, тэр дундаа Орос-Украины асуудлыг нэлээд нухацтай хэлэлцжээ. Энэхүү уулзалт нь НАТО-гийн дээд хэмжээний уулзалтаар Украиныг НАТО-д элсүүлэх эсэх асуудлыг хэлэлцэхийн өмнө болж буйгаараа онцлог. Тиймээс ч ерөнхийлөгч Ж.Байден нөхцөл байдал амаргүй, дайны байдалтай байгаа энэ үед Украин НАТО-д элсэх нь тохиромжтой эсэх талаар нухацтай бодож байгаагаа ч ярьжээ.

Талууд уулзалтын үеэр хоёр орны найрсаг дотно харилцааг эрхэмлэдэгээ аль аль нь онцолсон байна. Тухайлбал, Ерөнхийлөгч Ж.Байден “Бидэнд ярих зүйл их бий” гэсэн бол Ерөнхий сайд Р.Сунак санал нэгтэй байгаагаа илэрхийлжээ.

Английн Ерөнхий сайдын өргөөнд цаг гаруй саатсаны дараа ерөнхийлөгч Ж.Байден хаан III Чарльзын Виндсор ордныг зорьсон байна. Өнгөрсөн тавдугаар сард болсон Их Британийн хааны титэм залах хүндэтгэлийн ёслолд АНУ-ын ерөнхийлөгч Ж.Байден оролцоогүй, харин тэргүүн хатагтай Жилл Байден хүрэлцэн ирж байв. 74 настай хаан 80 настай ерөнхийлөгчийг Виндсор ордны төв талбайд хүндэт харуулын хамт угтан авчээ.

Их Британийн хаан III Чарльз сүүлийн жилүүдэд уур амьсгалын өөрчлөлтийн асуудалд багагүй зовниж, компанит ажлууд санаачлан явуулах болсон. Тиймээс ч АНУ-ын ерөнхийлөгчийн энэ удаагийн айлчлал уур амьсгалын өөрчлөлтийн асуудлыг голлон анхаарсан байна хэмээн “Ройтерс” агентлаг мэдээлжээ.  

Эх сурвалж: polit.mn