Б.Нандин

БНХАУ цахилгаан машин, хагас дамжуулагч болон өндөр технологийн салбарт өргөн ашиглагддаг зарим түүхий эдийг экспортлохыг хязгаарлаад буй. АНУ-Хятадын хооронд өрнөж буй худалдааны дайны улмаас энэхүү хориг хэрэгжиж эхэлсэн юм. Тэгвэл Хятадын Худалдааны яам үндэсний аюулгүй байдлыг хамгаалах үүднээс ирэх наймдугаар сарын 1-нээс эхлэн галлийн найман бүтээгдэхүүн, германий зургаан бүтээгдэхүүний экспортод хяналт тавина гэдгээ даваа гаригт мэдэгджээ. Энэ нь Хятадын технологийн дэвшлийг хязгаарлахаар АНУ-ын зүгээс хүчин чармайлтаа нэмэгдүүлэх болсны хариу хэмээн шинжээчид үзэж байна. Зарим шинжээчид энэхүү шийдвэр нь АНУ-ын Сангийн сайд Жанет Йеллений энэ долоо хоногт Бээжинд хийх айлчлалтай холбоотой байж магадгүй гэж үзэж байна. Мөн Вашингтон айлчлалыг цуцалж болзошгүй гэсэн таамаг дэвшүүлж эхэлжээ.

БНХАУ-ын энэхүү шийдвэртэй холбоотойгоор бүтээгдэхүүний зах зээлийн үнэ эрс өсч эхэлсэн байна. Одоогоор германий дотоодын зах зээл болон экспортын зах зээлд нэг кг нь 1380 ам.доллар байсан бол 1500 гаруй ам.доллар болж өсжээ.