Н.ЖАРГАЛМАА

Япон улс гамшгийн улмаас сүйдсэн “Фүкүшима” атомын цахилгаан станцын түлшний савыг хөргөхөд ашигласан усыг далайд хаяхаар төлөвлөөд байгаа.

Уг асуудлын хүрээнд Олон улсын Атомын энергийн агентлагийн Ерөнхийлөгч Рафаэл Гросси Япон улсад айлчилж байна. Айлчлалын хүрээнд Ерөнхий сайд Фүмио Кишидатай уулзаж ирэх хоёр жилийн аюулгүй байдлын шалгалтыг хэлэлцэнэ гэв. Одоогоор цахилгаан станцын усыг далай руу суллах эцсийн товыг тогтоогүй байгаа юм. Учир нь Олон Улсын Атомын энергийн агентлаг болон Токиогийн цахилгаан эрчим хүчний үндэсний цөмийн зохицуулалтын байгууллагуудын албан ёсны зөвшөөрөл бүхий шийдвэр гарах шаардлагатай. Эл шийдвэр энэ долоо хоногт гарч магадгүй гэж зарим эх сурвалж ярьжээ.

Хөрш зэргэлдээ орнуудын хувьд далайн ус руу “Фүкүшима”-гийн усыг урсгах нь бүс нутгийн хүн амын эрүүл мэндэд сөргөөр нөлөөлөх эрсдэлтэй хэмээн үзэж гомдол гаргасаар байгаа. Ялангуяа БНХАУ үүний хамгийн том эсэргүүцэгч юм. Бээжин өнгөрсөн мягмар гаригт Япон дахь Элчин сайдын яамаараа дамжуулан Олон улсын Атомын энергийн агентлагт Японы төлөвлөгөөг түтгэлзүүлэхийг уриалсан мэдэгдэл хүргүүлжээ. Мөн 2011 онд болсон гамшгийн дараа хэд хэдэн орнууд Японы зарим бүтээгдэхүүнийг хориглоод байсан юм.

Японы Гадаад хэргийн сайд Ешимаса Хаяши Гросситай хамтарсан хэвлэлийн бага хурал дээр “Бид цэвэршүүлсэн усыг далайд гаргахдаа олон улсын байгууллагын зөвшөөрөл болон шинжлэх ухааны нотолгоонд суурилсан ил тод зарчмаар ажиллана” хэмээн мэдэгдэв. Мөн цацраг идэвхийн хэмжээ олон улсад зөвшөөрөгдсөнөөс  доогуур байх болно гэжээ.

Эх сурвалж: www.polit.mn

Эх сурвалж: Ройтерс