А.Минжинсор

Сүүлийн 20 орчим жил ЮНЕСКО болон дэлхийн тэргүүлэх их сургуулиудаас “Сургалтын нээлттэй нөөц эх материал буюу Open education resource” хөдөлгөөнийг өрнүүлж байна.  Энэ хүрээнд  сурах бичиг, сургалтын бусад материалууд, онлайн хичээлүүдийг олон нийтэд нээлттэйгээр хэрэглэх боломжийг олгож байна. Энэ жишгээр МУИС-иас санаачлан,  “Ачит Ихт” компани ивээн тэтгэж, “Esan-Үндэсний цахим сан”-гийн нэг хэсэг болох “Цахим сурах бичгийн сан”-г өчигдөр нээлээ. Ингэснээр 30 гаруй эрдэмтэн багш нарын зохиосон суурь шинжлэх ухааны  академик сурах бичгүүдийг оюуны өмчийн нээлттэй лицензээр цахимжуулан үнэ төлбөргүйгээр Esan.mn сайт, аппликэйшн дээр уншиж, судлах боломж бүрдэж байна.

Уг “Цахим сурах бичгийн сан” нь интернэтэд холбогдсон хүн бүрт нээлттэй тул оюутан сурагчид орон зай, цаг хугацаа,  үнэ төлбөрт хязгаарлагдахгүй суралцах, хөгжих боломжтой. Мөн алслагдсан бүсийн сурагчид, хөгжлийн бэрхшээлтэй иргэд тэгш хүртээмжтэйгээр сурахад дэмжлэг болох юм.

“Цахим сурах бичгийн сан”-г дэмжин хэрэгжүүлж буй “Esan цахим сан”-гийн үүсгэн байгуулагч, захирал Ц.Мөнхтүвшин:- Манай Esan технологи талдаа дэд бүтцийнх, хэл хөгжүүлэлт болон хиймэл оюун ухаан хөгжүүлэлт гэсэн гурван хэсэгт хуваагдаж байна.  Цахим сангаа илүү хөгжүүлэх үүднээс шат шатны байгууллагуудтай хамтран ажиллаж  олон нийтийн мэдэх ёстой мэдлэгүүдийг цахимжуулан хүргэнэ. Одоогоор манай сангийн контент хөгжүүлэлтийн багийнхан БШУ-ны сайдын чиглэлийн дагуу ЕБС-ийн сурах бичгүүдийг цахимжуулах юм.

МУИС-ийн сургалт хариуцсан захирал Б.Батжаргал: - МУИС-ийн үндсэн тэнхимүүдийн хурлаар хэлэлцүүлэгдэн сонгон шалгаруулж авсан бүтээлүүд багтсан. Зөвхөн МУИС-ийн оюутнуудад бус физик, математик, биохими, биологийн чиглэлээр суралцаж байгаа оюутнууд мөн ЭЕШ бэлтгэж байгаа сурагчид, дунд сургуулийн багш нарт зайлшгүй хэрэгтэй сурах бичгүүдийг нээлттэй үзэх боломжийг бүрдүүллээ” гэв.

Одоогоор “Esan цахим сан”-д математик, шинжлэх ухааны 30 ном багтжээ.  Мөн зөвхөн оюутан залуус гэлтгүй арван жилийн сурагчид, хөдөө орон нутаг алслагдсан аймаг, сум дүүрэг гээд хаанаас ч, хэзээ ч интернэттэй үедээ хэрэгтэй мэдлэгээ олж авах боломжийг бүрдүүлэхийн тулд “Цахим сурах бичгийн сан”-г улам өргөжүүлэх юм байна.

Эх сурвалж:www.polit.mn