З.БАТЦЭЦЭГ

Казахстаны Парламентын Мажилисын (доод танхим) депутатууд энэ чиглэлийн үйл ажиллагааг эрх зүйн хувьд зохицуулахад чиглэсэн "Онлайн платформ ба онлайн сурталчилгааны тухай" хуулийн төслийг анхны хэлэлцүүлгээр нь баталлаа. Энэ тухай ТАСС агентлагийн сурвалжлагч хэргийн газраас мэдээлэв.

Тодруулбал, уг баримт бичигт "онлайн платформ хэрэглэгч", "блогер" гэсэн ойлголтыг хууль тогтоомжид оруулж, эрх, үүргийг нь тогтоожээ.

Хуулийн төсөлд цахим платформ дээр худал мэдээлэл түгээх, байршуулахыг хориглох тухай тусгасан. Нэмж дурдахад энэ нь казах хэлийг интерфэйс, онлайн платформуудын зохицуулалтад заавал оруулах боломжийг олгодог. Баримт бичгийг зохиогчдын үзэж байгаагаар, энэ нь олон нийтийн сүлжээний алгоритмуудад хууль бус материалыг хянах, түүнчлэн казах хэл дээр зохицуулалт хийх боломжийг олгоно.

Түүнчлэн цахим платформ эзэмшигчид худал мэдээлэл, татвараас зайлсхийсэнтэй тэмцэх чиглэлээр төрийн байгууллагуудтай хамтран ажиллах үүргийг тусгажээ. Тодруулбал, онлайн платформ дээр хууль бус материал илэрсэн тохиолдолд тухайн цахим платформын хууль ёсны төлөөлөгчдөд үүнийг арилгах тухай мэдэгдэл илгээнэ. Хэрэв энэ шаардлагыг хангаагүй бол эрх бүхий байгууллага онлайн платформын үйл ажиллагааг хязгаарлах эрхтэй.

Мөн хуулийн төсөлд цахим платформын хэрэглэгчдэд өөрийн хуудсанд байршуулсан онлайн сурталчилгаанд хаяг шошго тавих, бизнесийн хууль тогтоомжийн дагуу үйл ажиллагаа явуулах үүргийг тусгажээ. Баримт бичгийг зохиогчдын үзэж байгаагаар уг хуулийн төсөл нь далд ажлын байрыг бууруулах, нууц нэр, гуравдагч этгээдийн дансаар үйл ажиллагаагаа явуулдаг блогчдыг илрүүлэх үр дүнтэй алхам болно.

Хуулийн төслийн хэлэлцүүлгийг парламентын холбогдох хороодоор үргэлжлүүлнэ.

Эх сурвалж: www.polit.mn