Б.ДОЛЖИНЖАВ

Сэтгүүлчид өөрсдийн цахим хаягаа хэрхэн зохистой ашиглах хийгээд олон нийтийн сүлжээнд үзэл бодлоо илэрхийлэхдээ редакцаа төлөөлж буйгаа ухамсарлах нь чухал гэдгийг “Сэтгүүл зүйн ёс зүйн форум-2023”-ын үеэр онцоллоо.

Энэ талаар Хүмүүнлэгийн ухааны их сургуулийн Сэтгүүл зүй, медиатехнологийн тэнхимийн эрхлэгч, доктор, профессор Д.Дагиймаа “Сэтгүүлчид хоёр дүртэй болчихлоо. Сэтгүүлчийн ажлаа сайн хийж, чанартай бүтээл гаргадаг мөртлөө олон нийтийн сүлжээнд биеэ зохисгүй авч явдаг. Энэ нь сэтгүүл зүйн үнэмэлж буурахад нөлөөлдөг. Эх сурвалжаа доромжилсон, шоолсон, дорд агуулгатай пост оруулдаг. Үүнийг олон нийт хувь сэтгүүлч биш хэвлэлийн редакц гэж хардаг” гэсэн юм.

Харин Сэтгүүл зүйн инновац хөгжлийн үүр төвийн тэргүүн Б.Дуламхорлоо “BBC” агентлаг сэтгүүлч олон нийтийн мэдээллийн хэрэгслээ хэрхэн хөтлөх гарын авлагыг гаргаж байсан. Дэлхий нийтээр хэвлэл мэдээлэлд итгэх итгэл буурсан ч  сэтгүүлчдэд итгэх итгэл нэмэгдсэн. Тиймээс олон улсад сайн сэтгүүлчийнхээ олон нийтийн сүлжээний хаягаар дамжуулан редакцынхаа хэрэглэгчдийн тоог нэмэгдүүлж, өөрсдийгөө сурталчилж байна. Үүнийг сайн жишээ гэж хардаг. Тиймээс сэтгүүлчид олон нийтийн мэдээллийн хэрэгслээ хэрхэн хөтлөх журам гаргаж, энэ хаягаа ашиглаж хэвлэл мэдээллийн хэрэгслээ хэрхэн сурталчилж, хэрэглэгчээ татах вэ гэдгийг зохицуулж өгөх нь зөв.Сэтгүүлчийн цахим орчин бол хэрэглэгчээ татах нэг боломж гэж харах хэрэгтэй” гэсэн санаачилгыг дэвшүүлэв.

 Эх сурвалж:www.polit.mn