П.АМГАЛАНБАЯР
Танхимд ороход үлгэрийн мэт сонирхолтой дүр дүрслэл бүхий орчин угтлаа. Үлгэрийн баатрын ертөнцөд очсон мэт ер бусын сэтгэгдэл төрүүлж байв. Энэ бол Соёлын тэргүүний ажилтан, уран барималч Ч.Энхбаярын “Туульс” бие даасан үзэсгэлэнгийн танхим. Тэрбээр уран бүтээлийн хоёр дахь үзэсгэлэнгээ Соёлын яамны галерейд дэлгэжээ. Уг үзэсгэлэн Монгол туульсын дээд, дунд, доод тивийг уламжлалт дүр дүрслэл болон сюрреализм урлагтай хослуулсанаараа онцлог. Энэ тухай тэрбээр “Уран бүтээлч бүхэн өөрийн арга барил онцлогтой. Харин миний хувьд баатарлаг дүр төрхийг бага зэрэг хэтрүүлэгтэй мөртлөө уламжлалт хэв шинжээ хадгалсан байдлаар хийж буйгаараа онцлог болов уу. Тиймээс миний хийцтэй илүү ойр байсан учраас туульсын баатруудыг урлаж “Туульс” үзэсгэлэнгээ гаргаж байна” гэсэн юм. Мөн тэрбээр бүтээлээ урлахдаа чулуу, арьс, төмөр зэрэг холимог техник ашиглан монгол баатруудын сүр хүч, дайчин байдал, эрэмгий зоригтой дүр төрхийг илүү тодотгон дүрсэлжээ. Зарим бүтээлээ том хэмжээтэй урласан нь гүнзгий сэтгэгдэл төрүүлэм шийдэл болсон байв. Өвөрмөц шийдэл дүр, дүрслэл бүхий уг үзэсгэлэнг энэ сарын 31-ийг хүртэл үзэгчдэд толилуулах юм байна.
Уран барималч Ч.Энхбаяр Улаанбаатарын уугуул бөгөөд өвөө, эмээ Завхан аймгийн Отгонтэнгэр сумын харьяат аж. Энэ тухайгаа “ Би хүүхэд насаа өвөө эмээ дээрээ өнгөрүүлсэн. Өвөө маань модоор янз бүрийн зүйл урладаг гарын дүйтэй хүн байсан. Хөдөөний ахуй амьдралд хэрэгтэй зүйлсээ өөрөө урлачихдаг байлаа. Тиймээс энэ бүхнийг багаасаа харж өссөн учраас миний хүсэл мөрөөдөлд нөлөөлсөн хамгийн том хүч бол өвөө минь гэж боддог. Багаасаа зурах сонирхолтой, гарын дүйтэй хүүхэд байсан. Тэгээд Хүүхдийн урлан бүтээх төвд тавдугаар ангиасаа сийлбэрийн ангид сурч эхэлсэн” гэсэн юм. Тэрбээр анхны бие даасан үзэсгэлэнгээ өнгөрсөн оны есдүгээр сард мөн “Туульс” нэртэйгээр үзэгчдэд хүргэж байсан юм.
Эх сурвалж:www. polit.mn