Б.Туул

МЗЭ-ийн шагналт яруу найрагч, "Болор цом"-ын эзэн А.Эрдэнэ-Очир  Бүгд найрамдах Македон улсын Струга хотноо болох дэлхийн яруу найргийн 53 дугаар их наадамд оролцохоор болжээ. Өмнө нь энэ наадамд манай улсаас өмнө нь яруу найрагч Г.Мэнд-Ооёо, Г.Аюурзана, Дан.Нямаа, Ц.Бавуудорж, зохиолч Б.Золбаяр, нэрт гүүш Ж.Гэндэндарам,  “Болор цом” наадмын тэргүүн шагналт, модернист яруу найрагч Б.Галсансүх нар оролцож байсан юм. Харин энэ удаа А.Эрдэнэ-Очир оролцож,
орон орны яруу найрагчдад зориулан англи, монгол хэлээр шүлгээ уншиж сонирхуулах гэнэ. Тэрээр тус наадамд оролцох урилгыг өнгөрсөн долдугаар сард хүлээн авсан гэнэ. Тус наадмыг зохион байгуулагчдын зүгээс А.Эрдэнэ-Очирыг  өөрийн намтар болон таван шүлгээ англи, франц хэлээр хөрвүүлж, ирэхийг хүсчээ. Мөн сүүлд хэвлүүлсэн уран бүтээлийг нь номын үзэсгэлэнд тавихаар болсон байна.  Дэлхийн яруу найргийн наадам энэ сарын 21-25-ны өдрүүдэд болно.

Дэлхийн яруу найрагчдын их чуулган нь орон орны яруу найрагчид дундаас  авьяас чадвараараа ялгарч чадсан “Алтан титэм”-ийн эзнийг тодруулдаг аж.  Ийнхүү “Алтан титэм” хүртсэн найрагч өөрийн нэрэмжит модоо Струга хотын “яруу найргийн цэцэрлэгт хүрээлэн”-д тарьдаг юм байна. Тэрхүү цэцэрлэгт Андрей Вознесенский, Аллэн Гинзбэрг, Иосиф Бродский, Нобелийн шагналт зохиолч Шиймус Хээни, Томас Транстрүмэр нарын тарьсан модод өдгөө ч өтгөн саглагар  навчсаараа намрын зөөлөн салхийг хөглөж, найраг шүлгийн онгод хөгжөөн байдаг гэнэ.