Л.Хэрлэн

Японы мэргэжлийн сүмогийн 71 дэх их аварга М.Ананд сонин ихтэй байна. Тэрээр эх орондоо ирэнгүүтээ төрсөн нутаг Сүхбаатар аймгийн Асгат сумыг зорьж, улмаар Алтан-Овоо, Шилийн Богддоо очиж эрч хүч энергиэр өөрийгөө цэнэглээд өчигдөр Улаанбаатарт иржээ. Түүний хувьд аварга цол хүртсэнээс хойш тийм ч сайн барилдаагүй. Тэр нь аварга цолондоо дасаагүйнх, биеэ барьж байгаа нь холбоотой гэхчлэн сүмо сонирхогчид дүгнээд буй. Тэгвэл өчигдөр Японд сүмогийн холбооны зөвлөлийн хурлын шийдвэр гарч гуч дахь тэмцээндээ түрүүлсэн ёкозүна хакүхо М.Даваажаргалын барилдааныг сайшаан өндрөөр үнэлсний сацуу их аварга Харүмафүжи Д.Бямбадорж, Какүрю М.Ананд нарыг шүүмжилж байгаагаа мэдэгдсэн. Хэвлэлийнхэн энэ тухай мэдээллийг өчигдөр шууд дамжуулсан бол тэр үеэр М.Ананд аварга ах дүүсийн хамт Гандантэгчинлэн хийдэд ном уншуулж явсан сураг дуулдав. Энэ бүхэн урьдчилж мэдсэн хэрэг бус зүгээр л  тохиолдол  байх. Харин эх орондоо ирж, ээж аавдаа үнсүүлж, шүтээн болсон Алтан-Овоо, Шилийн Богддоо хүндэтгэл үзүүлж, бас Гандан хийддээ ном уншуулсан  их аварга маань   дараагийн башёд аварга цолтойгоо түрүүлнэ биз ээ. Түүнд амжилт хүсье.