Б.Дамдин-Очир

МАН-ын бүлгийн дарга С.Бямбацогт нарын хүмүүс БНХАУ-ын Элчин сайд Ван Шяолунд “бараалхсан” тухай мэдээлэл зарим сайт, сонинуудаар гарчээ. С.Бямбацогттой хамт  “MCS” группын дэд ерөнхийлөгч н.Энхтүвшин, "Барс" группын захирал Ч.Амарбаатар нар оролцсон байна.

Тэд БНХАУ-ын дарга Си Зиньпин манай улсад айлчлах гэж байгаатай холбогдуулан хоёр улсын хоорондох бизнесийн асуудлыг ярилцсан гэнэ.

Хэдийгээр улс төр эзгүйрч, хүмүүс хээр хөдөө гараад нам жим байгаа ч МАН-ын бүлэг “зүгээр суухаар зүлгэж суу...” гэдэг шиг байх юм гэцгээж байна.

Чухамдаа МАН-аас мэдээлээд байгаа шиг Хятадын даргын айлчлалын асуудлыг шийдэх бүхэл бүтэн яам, тамгын газар, ёслолын алба сэлт нь бий. Айлчлалын үеэр юу ярихыг, ямар асуудал шийдэхийг зорихыг шийдэх Төрийн тэргүүн, Парламентын спикер, Ерөнхий сайд нь байна.

МАН дотоод бодлогын хувьд Засгийн газарт багтаж, МАНАН үүсгэх сонирхолтой байгаа нь нууц биш болсон. Гэхдээ намынхаа дотоод бодлогыг улсын гадаад бодлоготой хольж хутгана гэдэг даанч тоогүй.

Нөгөөтэйгүүр С.Бямбацогт бол Монгол  Улсын Их хурал дахь цөөнхийн бүлгийн ахлагч. УИХ дахь Сөрөг хүчний удирдагч гэсэн ч болно. Манай улстөрчид хийгээд олон нийт түүнийг энэ утгаар нь хүндэтгэдэг. Харин мань эр Хятадын Элчин сайдтай уулзалт хийснээ улстөр болгон өндөрт өргөх нь хэр зэрэг зүйд нийцэх бол. Хүндээ хөнгөнөөс... гэж монгол үг бас бий дээ.

С.Бямбацогт гишүүн яаж ийгээд л улстөр хийхийн тулд хаана, хэнтэй, юу ярьж байгаагаа ч анзаарахаа больсон бололтой юм.