• Зууны мэдээ сонин онлайн захиалга

Оскар-2021:Шилдэг найруулагчаар Хятад эмэгтэй шалгарлаа

2021-04-26 17:58

 

Б.ДОЛЖИНЖАВ

Кино урлагийн шилдгүүдийг тодруулдаг, хамгийн алдартай “Оскар-2021” наадам өчигдөр болж өндөрлөлөө. 93 дахь удаагийн наадмаас шилдэг найруулагчийн шагналыг  Хятадад төрсөн Клое Зао хэмээх эмэгтэй нүүдэлчдийн тухай өгүүлсэн  "Nomadland" киногоороо хүртсэн нь ихээхэн онцлогтой байв.

Киноны уламжлалт хэв маягийг эвдсэн түүхэн кино хийсэн нь шүүгчдийн анхаарлыг ихэд татаж, гурван шагнал хүртжээ. "Nomadland" киноны гол дүрд АНУ-ын алдартай жүжигчин, продюсер  Фрэнсис Мак-Дорманд  тогложээ.

Зао  шилдэг найруулагчийн шагналыг хүртсэн анхны Ази, хоёр дахь эмэгтэй найруулагч юм. Түүний өмнө Кетрин Бигелоу "The Hurt Locker" киногоороо шилдэг найруулагчаар шалгарч байсан.Америк болон Англид боловсрол эзэмшсэн Зао АНУ-д бие даасан уран бүтээлчээр ажилладаг. Тэрбээр 1982 онд Бээжин хотод төрсөн бөгөөд 39 настай. Түүний найруулсан анхны кино “Songs My Brothers Taught me” 2015 онд нээлтээ хийж байв.

Хятадын хаана ч энэ жилийн Оскарын наадмыг шууд дамжуулан хүргэсэнгүй. Жил бүрийн уг наадамд Хятадын хоёр том суваг ирж олон нийтэд хүргэдэг байсан билээ. Дэлхий нийтээр Заогийн шагналыг онцгойлон мэдээлж байгаа ч Хятадын төв хэвлэл Синьхуа агентлаг болон бусад мэдээллийн сайтуудад одоог хүртэл ямар ч мэдээлэл гарсангүй. Мөн түүний ялалтын тухай мэдээллийг олон нйитийн сүлжээнд хуваалцахыг хязгаарлажээ.

Клое Зао гуравдугаар сард “Алтан бөмбөрцөг” наадмаас шилдэг найруулагчийн шагнал хүртсэний дараа Хятадын төв хэвлэл “Global Times” түүнд баяр хүргэж, Хятадын бахархал хэмээн бичиж байв. Гэхдээ түүний энэ магтаал удаан үргэлжлээгүй. Учир нь түүний  2013 онд АНУ-ын киноны сэтгүүл “Filmmaker”-т өгсөн ярилцлагыг Хятадын интернэт хэрэглэгчид олж үзсэн юм. Тэрбээр тус ярилцлагад Хятадад өнгөрүүлсэн хүүхэд насаа “Хаа сайгүй худалч хүмүүс байдаг байсан” хэмээн дурсан ярьсан нь шүүмжлэлд өртсөн. Мөн Зао саяхан Австралийн хэвлэлд ярилцлага өгөхдөө “АНУ бол миний эх орон” хэмээн ярьсан ишлэл олонд тархсан. Гэвч  дараа нь тус сайт “АНУ бол миний эх орон биш” гэж хэлсэн хэмээн залруулсан билээ.

Гэвч Хятадын үндэсэрхэг үзэлтнүүд цахимаар Зао руу дайрч, түүнийг Хятадад хор хохирол учруулсан хэмээн үзэж, киног нь үзэхээ болихыг уриалсан юм. Үүнтэй холбоотойгоор "Nomadland" кино энэ сарын 23-нд албан ёсоор нээлтээ хийх байсан ч  Хятадын Weibo платформ дээрээс устсан юм.Уг нь Заогийн нэр алдар өссөнөөс хойш тэрбээр Хятадыг шүүмжлээгүй. Найман жилийн өмнөх нэг өгүүлбэрээс болж түүний нэр хүнд Хятадад унаад байгаа юм.

Үүнээс гадна Зао 2019 онд Хонгконгт өрнөсөн ардчиллын төлөө тэмцэгчдийн тухай өгүүлэх 35 минутын "Do Not Split” богино баримтат киног Оскарт нэр дэвшүүлсэн нь Хятадын Засгийн газрын дургүйг хүргэсэн байж болзошгүй юм.

Гэхдээ Заог дэмжигчид Хятадад  олон бий. Тэд Weibo дахь албан бус хаягаараа түүний ялалтын мэдээг хуваалцаж, баяр хүргэсэн сэтгэгдэл үлдээсэн юм. Гэвч удалгүй хэдхэн цагийн дараа постууд нь алга болжээ. Постуудаас хамгийн олон хүнд хүрсэн нь Зао Оскарын нээлтийн үеэр  Хятадад төрсөндөө бахархдаг талаараа ярьсан тухай бичлэг байсан юм. Тэрбээр аавтайгаа Хятадын сонгодог шүлэг чангаар уншдаг байжээ. Тэрбээр “Намайг хүүхэд байхад  Хятадын сонгодог зургаан  шүлэг надад хамгийн их нөлөө үзүүлсэн. Одоо ч би тэдгээрт итгэдэг” гэж ярьжээ.

Эх сурвалж:CNN

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.