Нэгдсэн Үндэстний Байгууллагын Хүүхдийн сан, TВ-9 телевизтэй хамтран ажиллах санамж бичигт гарын үсэг зурлаа. Энэхүү хамтын ажиллагааны гол зорилго нь хоёр тал хүүхдийн сайн сайхны төлөө бодит ажил хэрэгжүүлж, өсвөр үеийнхэнд чиглэсэн бүтээлч, эерэг контентуудыг хамтран бүтээхэд чиглэж байна. TВ-9 телевиз нь байгуулагдсан цагаасаа нийгмийн хариуцлагатай, олон нийтэд чиглэсэн, үндэсний өв соёлыг сурталчилсан контентуудыг тууштай бэлтгэсээр ирсэн. Энэ жил TВ9 телевиз өсвөр насны хүүхэд, залуучуудын мэргэжил сонголтод бодит нөлөө үзүүлэх зорилготой “Маргаашийн би – Өнөөдрөөс эхэлнэ” уриатай төсөл хөтөлбөрийг амжилттай хэрэгжүүлж байна. Ингээд энэ төсөл дээр Нэгдсэн Үндэстний Байгууллагын Хүүхдийн сан ТВ9 телевизтэй хамтран ажиллахаар болсон ба ТВ9 телевизийн ТУЗ-ын дарга Э.Бямбадулам, НҮБ-ын Хүүхдийн сангийн Суурин төлөөлөгч Эваристе Коуасси Комлан нар хамтран ажиллах санамж бичигт гарын үсэг зурлаа.
НҮБ-ЫН ХҮҮХДИЙН САНГИЙН СУУРИН ТӨЛӨӨЛӨГЧ ЭВАРИСТЕ КОУАССИ КОМЛАН: -Юун түрүүнд ТВ9-ийг бидэнтэй хамтран ажиллаж, хамтын ажиллагаагаа эхлүүлж байгаад маш их баяртай байна. ТВ9 телевиз нь Монголын хамгийн олон үзэгчидтэй телевизийн нэг бөгөөд ялангуяа хөдөө орон нутгийн иргэд ТВ9 телевизийг маш их үздэгийг бид мэднэ ээ. Жишээлбэл хотын хүүхдүүдийн өдөр тутамдаа авдаг зарим мэдээллийг хөдөөний хүүхдүүд байнга авч чаддаггүй ээ. Ийм учраас бидний хамтын ажиллагаа чухал юм аа. Тэгэхээр энэ хамтын ажиллагааны хүрээнд ТВ9 телевиз нь хүүхэд багачууд, өсвөр үеийнхэн, сурагчдын боловсролд юу хэрэгтэй байгаа, тэдний ирээдүйн ажил, амьдралд юу чухал болох, ирээдүйн сайхан амьдралаа бий болгохын тулд хүүхэд багачууд юунд суралцах, юуг мэдэх ёстой талаар эерэг мессежийг дамжуулдаг суваг болно гэж бид найдаж байна. Бидний энэхүү хамтын ажиллагаа нь нийгмийн бүхий л давхаргад, ялангуяа 18 хүртэлх насны хүүхдүүдэд өөрсдийн амьдралын ирээдүйн чухал шийдвэрээ гаргах боломжийг олгоход чухал тус дэм болно гэж харж байна. Тийм учраас ирэх жилүүдэд Монголд, Монголын өсвөр үеийнхэнд томоохон, эерэг нөлөө үзүүлэх энэхүү хамтын ажиллагааг эхлүүлж байгаадаа бид маш их баяртай байна.
Төслийн хүрээнд олон улсын дипломат, хүүхэд хамгааллын бодлого тодорхойлогч, нийгмийн ажилтан болох хүсэл мөрөөдөлтэй ахлах ангийн хоёр сурагчийг онцолж, тэд нэг өдрийн турш НҮБ-ын Хүүхдийн санд ажилласан онцгой контентыг үзэгчдэд хүргэхэд бэлэн болжээ. Хүүхдүүд энэхүү өдрөөр өөрийн хүсэл тэмүүллийг мэргэжил болгон бодитоор мэдэрч, зөв сонголт хийх чадамжтай эсэхээ сорьсон байна.
