Л.ХЭРЛЭН

Японы мэргэжлийн сүмогийн 71 дэх их аварга М.Анандыг эх орондоо хурдан ирээсэй гэсэн хүлээлт монголчуудад байна. Тэр дотроо түүний төрсөн нутаг Сүхбатаар аймаг, тус аймгийн Асгат сумын нутгийн зөвлөлөөс  их аваргыг  угтах, хүлээж авах  бэлтгэлээ хангаж байгаа сурагтай.Харин  Монголд ирэх тов тодорхойгүй,  арлын оронд өрнөж буй 71 дэх их аваргад үзүүлэх ёслол хүндэтгэлийн ажиллагаа хараахан дуусах болоогүй байгаа гэнэ. 

Сонирхуулахад их аварга М.Ананд 2001 оны есдүгээр сарын 31-нд  15 настайдаа сүмод хүч үзэхээр Японд хөл тавьсан.  2008 оны  намар “Монгол башё”-д ирэх үеэрээ өөрийн өвгөд дээдэс, аав ээжийнхээ нутгаар цоллуулах хүсэлтээ нутгийн зөвлөлдөө албан ёсоор тавьж, Японы мэргэжлийн сүмогийн дээд зиндаанд барилдахдаа Сүхбаатар нутгаараа овоглон барилдах болсон юм. Токио дахь түүний гэрийн хойморт Алтан Овоо, Шилийн Богд уулын зураг, нутгаасаа авч гарсан галт уулын чулуу  хүндтэй байрыг эзэлдэг  ажээ.