Ч.ГАНТУЛГА

Нийслэлийн архивын газрын дарга С.Гавааг “Хэн нь хэн бэ” буланд онцлов. Амьдралынхаа 24 жилийг энэ байгууллагад зориулсан түүнд салбарынхан нь ам сайтай байдаг юм билээ. Тэрээр 1990 онд Монгол Улсын их сургуулийг түүх, архив судлаач, 1996 онд Засгийн газрын төрийн захиргаа, удирдлагын хөгжлийн инстутыг удирдлагын арга зүйч, зохион байгуулагч мэргэжлээр төгсчээ. Мөн архивын салбарт хийх эрхзүйн шинэчлэлийн асуудлаар түүхийн шинжлэх ухааны магистер цолыг хамгаалсан байна. Харин ажил амьдралын гараа нь 1990 онд Улаанбаатар хотын ардын депутатын хурлын гүйцэтгэх захиргаа, нийслэлийн засаг захиргааны тамгын газрын архивын эрхлэгчээс эхэлжээ. Тэрээр 1998 оноос Нийслэлийн архивын газрыг өнөө хүртэл удирдаж байна. Тэрээр 16 жилийн хугацаанд байгууллагадаа шинэчлэл хийн, салбартаа хүлээн зөвшөөрөгдсөн боловсон хүчний нөөцтэй, ажлын чиг үүрэг, үзүүлэлт сайтай байгууллагаар удаа дараалан шалгарсан амжилттай явна. Түүний удирдсан хамт олон 2000-2005 онуудад ажил дүгнэлтийн үнэлгээгээрээ нийслэлийн хэмжээнд тогтмол дөрөвдүгээр байр эзэлж, “Бүрэн хангалттай” гэсэн үнэлгээ авчээ. Харин 2007 онд Засаг даргын хэрэгжүүлэх агентлагуудаас тэргүүн байранд орсон амжилттай. Мөн 2000, 2004 оны архив, албан бичиг хөтлөлтийн үзүүлэлтээр улсад нэгдүгээр байранд шалгарсан байна. Энэ бол С.Гаваа даргын удирдан зохион байгуулах чадвар, ажилдаа үнэнч хөдөлмөрч байдлын үр дүн гэж нийслэлийн архивын газрын ажилтан хамт олон хэлж байсан юм. Нийслэлийн архивын газар бол Монголын түүхийг хадгалдаг арвин баялагтай байгууллага. Хотод үйл ажиллагаагаа явуулж буй албан байгууллага, ажилтан бүрийнх нь мэдээлэл бий. Тиймээс албан хаагчид нь С.Гаваа даргыгаа “Түүх хамгаалагч” гэж нэрлэсэн ажээ. Харин С.Гаваа дарга 2013 онд тулгамдаад байгаа зургаан асуудлаа Нийслэлийн Засаг дарга Э.Бат-Үүлд өргөн барьсан гэнэ. Хэрэв энэ онд багтаад тэдгээр асуудлыг шийдчихвэл Нийслэлийн архивын газар өөрийн гэсэн байртай болж, үйл ажиллагаагаа илүү өргөн цар хүрээтэй явуулах боломжтой болох юм. С.Гаваа даргын 2014 онд зорьж буй ажил нь энэ.