Д.Болор

УИХ-ын гишүүн Ц.Нямдорж “Алтан Дорнод Монгол”-ын захирал асан, ОХУ-ын иргэн С.В.Паушокийн талаар хэвлэлийнхэнд хандлаа. Тэрээр С.В.Паушокийг хэвлэл мэдээллийн хэрэгсэл ашиглан өөрийг нь гүтгэж байна гэж үзжээ. Энэ талаар “МАН-ын XXVII Их хуралтай зэрэгцээд зохион байгуулалттай, захиалгаар С.В.Паушоктой ярилцлага хийсэн байна. ОХУ-ын иргэн С.В.Паушок, Монгол Улсын Засгийн газар хоорондын маргаан Арбитрийн шүүхэд байхад буюу  2008 оноос хэлэлцээр хийе гэх далд дарамтыг С.В.Паушок байнга үзүүлж байсан. Тухайн үед хуулийн хүрээнд маргааныг шийдүүлэхээр болсон юм.  Маргаан явсаар 2011 онд 168 хуудас бүхий Арбитрийн шүүхийн шийдвэр гарч, бүх асуудлыг Монголын талд нааштайгаар шийдвэрлэсэн. Үүнд дургүйцсэн С.В.Паушок Монгол Улсын дотоод хэрэгт оролцох, эмх замбараагүй байдал үүсгэх далд явуулга хийлээ” гэв. Түүнээс зарим асуултад хариулт авлаа.

-Таныг С.В.Паушок “Алтан Дорнод Монгол” компанийн асуудалтай холбож байна.  Ямар үндэслэлээр ийм  ярилцлага өгсөн гэж үзэж  байна вэ?

-С.Баяр, Сү.Батболд, Ц.Мөнх-Оргил бид дөрвийн нэрийг ярилцлагадаа дурдсан байсан. Энэ маргаан С.Баярын Засгийн газраас эхлээд Сү.Батболдын Засгийн газрын үед дууссан учраас тэгж ярьсан байх. Намайг тэдний гар хөл, тэр байтугай аллага зохион байгуулсан гэсэн байна лээ. Машинаа барьж яваад  нас барсан хүний үхэлд буруутгасан  байгаа юм.

-МАН-ын Их хурлын үеэр зориуд ийм ярилцлага гаргалаа гэж хэлэх гээд байна уу?

-С.В.Паушок бол гэнэтийн ашгийн 68 хувийн татвартай холбоотойгоор 1.5 тонн алтыг хадгалж татвар төлөхөөс зайлсхийсэн хүн. Харин би Хууль зүйн сайд байхдаа энэ асуудлыг хуулийн хүрээнд нь шийдвэрлүүлсэнд С.В.Паушок хорсч яваа.

-С.В.Паушок Монголын хууль хяналтын байгууллагад шалгагдаж байхдаа оргон зайлсан. Түүнийг хилээр гаргахад хууль хяналт, хил гаалийнхан тусалсан гэж яригддаг?

-Намайг 2008 онд Хууль зүйн сайдаар ирэхэд С.В.Паушок хилээр гарчихсан байсан. Хууль хяналтынхан оролцсон эсэх нь баримтаар нотлогдоогүй. Ер нь Монгол Улсын хил хамгаалахад амаргүй. Хоёр хөрштэй 10 мянга гаруй км газраар хиллэсэн. Газар нутгаа сайн мэддэг нутгийн хүнтэй танилцахад л хилээр гарчих боломжтой гэдэг ойлголтыг надад өгсөн.