Монгол Улсын Ерөнхийлөгч Х.Баттулгын зарлигаар өнөөдөр /12.29/ "Монголын геологи ба ашигт малтмал” хэмээх НАЙМАН БОТЬ бүтээл Төрийн соёрхол хүртлээ. Тус найман боть цуврал бүтээлийг туурвихад ШУА-ийн Геологи-эрдэс баялгийн хүрээлэн, Палеонтологийн төв, МУИС, ШУТИС болон хувийн компанид ажиллаж байгаа, чөлөөнд гарсан нийт 50 орчим эрдэмтэн геологчид оролцсон байна. Тэдгээр эрхмүүд болох Шинжлэх ухааны доктор Жамбын Бямба, академич Ринчений Барсболд, Шинжлэх ухааны доктор Очирын Гэрэл, Шинжлэх ухааны доктор Жаргалын Лхамсүрэн, Монгол Улсын Зөвлөх инженер Самбаллхүндэвийн Алтангэрэл, Шинжлэх ухааны доктор Намжилын Жадамба нарт Монголын геологийн шинжлэх ухааны хөгжилд онцгой хувь нэмэр оруулсныг үнэлж, Ерөнхийлөгчийн зарлигаар Төрийн шагнал хүртээсэн нь энэ юм. Цуврал бүтээлийн ач холбогдол 1. Эдгээр бүтээл нь хамгийн түрүүнд Монгол Улсын нутаг дэвсгэрийн сүүлийн 30-60 жилийн хугацаанд буй болсон геологийн бүхий л талын судалгааны материалыг үндэсний геологч-эрдэмтэд туурвисан анхны нэгтгэл болж байгаа юм. 2. Энэ бүтээлүүд нь геологи, эрдэс баялгийн салбарт хөрөнгө оруулалт нэмэгдэж байгаа энэ үед гадаад, дотоодын өргөн олон геологчидын эрэлт хэрэгцээг ямар нэгэн хэмжээгээр хангахад чиглэгдсэн. 3. Их, дээд сургууль ба коллежид геологи, эрдэс баялгийн мэргэжлээр суралцаж байгаа оюутан залуучуудад үндэсний хэл дээр бичигдсэн сурах бичиг ховорхон байгаа энэ үед гарын авлага, лавлах материал болж байна. 4. Өөрийн орны нутаг дэвсгэрийн геологийн тогтоц, ашигт малтмалын нөөцийг нэгэн цаг үеэр тасалбар болгон нэгтгэнэ гэдэг бол ганцхан улс дотооддоо улс орныхоо болон аймаг орон нутгийн хөгжлийг түргэсгээд зогсохгүй улмаар дэлхий дахинд өөрийн орноо сурталчлах, тусгаар тогтнолоо баталгаажуулахад онцгой чухал ач холбогдолтой юм. Эх сурвалж:www.polit.mn