С.САРУУЛ Булган аймгийн Бугат сумын нэгдүгээр багийн нутагт “Баруун бэрх” гэх газарт оршин суух иргэн “Б” бусдад зодуулж амиа алджээ. Түүнийг улс төрийн шалтгаанаар амиа алдсан гэсэн мэдээлэл байгаа юм. Энэ талаар ЦЕГ-аас тодруулахад “иргэн “Б” Орхон аймгийн нэгдсэн эмнэлэгт бусдад зодуулсан байдалтай энэ сарын 19-ны өдөр ирж хэвтэн эмчлүүлж байгаад нас барсан хэргийг Булган аймгийн цагдаагийн газарт хэрэг бүртгэлтийн хэрэг нээн шалгаж байна. Тодруулбал, энэ сарын 18-19-нд шилжих шөнө Булган аймгийн Бугат сумын нэгдүгээр багт оршин иргэн “Б” түүний эхнэр “У” болон тус багт оршин суух 4 гэр бүлийн нийт 10 хүн “Б”-ийн гэрт архидан согтуурч улмаар хохирогчийн эхнэр “У” нь уг хэрэгт шалгагдаж байгаа “Д” гэгчийн эхнэртэй үл ялиг буюу хүндэлж харьцсангүй гэх зүйлээс болж маргалдан улмаар тэднийг өмөөрч нөхрүүд нь хоорондоо зодолдсоны улмаас иргэн “Б” гэмтэл авч эмнэлэгт хүргэгдэн эмчлэгдэж байгаад нас барсан байна. Хэргийг шалгаж байгаа цагдаагийн газраас “Уг хэрэг улс төрийн шалтгаанаар үйлдэгдсэн” гэсэн мэдээлэл нь худал бөгөөд цаашид хэргийн талаар буруу, ташаа мэдээллийг олон нийтэд хүргэхгүй байхыг анхааруулсан байна. Хоёр эхнэр нь биенээ хүндэлж харьцсангүй гэсэн өчүүхэн шалтгаанаас үүдэн маргалдаж эхнэрүүдээ нөхрүүд нь өмөөрч зодолдон улмаар нэгэн амь насаа нөгөө нь эрх чөлөөгөө алдаж харамсалтай” гэлээ. Эх сурвалж: www.polit.mn