Ч.Тулга Говь-Алтай аймгийн Жаргалан сумын дунд сургуулийн тааз өчигдөр нуржээ. Энэ үеэр сурагчид ангидаа байгаагүй гэнэ. Тус сургуулийг 1973 онд барьсан юм байна. Харин өнөөг хүртэл бүрэн засвар ороогүй аж. Сумын удирдлага засвар шинэчлэл хийх талаар жил бүр аймгийн удирдлага, орон нутгаас сонгогдсон гишүүддээ танилцуулдаг ч шийдэлд хүрэхгүй байсаар өнөөдөртэй золгожээ. Энэ тухай сургуулийн захирал Ш.Болдбат “Манай сургуулийн барилгын насжилт  өндөр. Өнгөрсөн хугацаанд их засвар хийгдээгүй. Зуны улиралд бороо орвол байнга дусаал гоожино. Бид 2003 оноос хойш их засвар хийлгэхээр зураг төслөө гаргаж, холбогдох байгууллагуудад хүргүүлсэн  ч шийдэгдээгүй хэвээр байна. Нуулгүй хэлэхэд цаашдаа бүх ангийн тааз нурах эрсдэл бий. Иймд холбогдох байгууллагууд нь анхаарч, манай сурагчдыг аюулгүй орчинд суралцахад нь туслаасай гэж хүсч байна” гэв. Говь-Алтай аймгийн Жаргалан сум нь нийслэлээс 1130 км зайд орших бөгөөд байгалийн үзэсгэлэнт газар ихтэй говь хангай хосолсон нутаг ажээ. Эх сурвалж: polit.mn