Х.ОЮУНБОЛД   Польшийн Катовиц хотод 200 гаруй орны гадаад албаны ажилтнууд уулзаж уур амьсгалын өөрчлөлтийн тухай Парисын гэрээг хэрэгжүүлэх ерөнхий зорилгын  талаар хэлэлцсэн XXIV  чуулган өнгөрсөн бямба гаригт өндөрлөсөн байна. Бүтэн шөнийн турш хуралдаж өндөрлөсөн чуулганы дараа хэлэлцээрт оролцсон орноос хүлэмжнээс ялгарах хийг хэмжих нэг стандартыг дагаж мөрдөх, цаг агаартай холбоотой улс төрийн бодлогыг биелүүлэхийг шаардахаар болжээ. Үүнийг дагаж мөрдсөнөөр 2015 онд батлагдсан Парисын гэрээнд дэлхийн температурын хэмийн өсөлтийг хамгийн багадаа хоёр цельсээс хэтрүүлэхгүй байхаар хязгаарлахаар заасан зорилгын хэрэгжилтийг баталгаажуулахыг эрмэлзсэн байна. Харин чуулганы дарга Михайл Куртыка “Парисын гэрээний ажлын хөтөлбөрийг хэрэгжүүлэх гэдэг бол маш чухал үүрэг хариуцлага юм. Энэ бол их урт зам байлаа. Бид хэн нэгнийг үлдээхгүйн тулд чадах бүхнээ хийсэн” хэмээн онцоллоо. Түүнчлэн чуулганы үеэр хэлэлцсэн хэлэлцээрийн хүрээнд дэлхийн орнуудыг 2020 онд хийхээр төлөвлөсөн дараагийн чуулганаас өмнө хүлэмжнээс ялгарах хий ялгаруулалтыг багасгахад зориулсан төлөвлөгөөгөө эрчимжүүлэхийг уриалсан уриалга орсон байна. Үүнээс гадна хөгжингүй орнуудыг тэдний зүгээс ядуу оронд байгалийн гамшигтай тэмцэхэд нь бэлэн байх, цэвэр эрчим хүчний илүү их эх үүсвэрийг бий болгоход нь ямар тусламж санал болгохоор төлөвлөж, бодож байгаагаа хэлэхийг хүсжээ. Харин зарим оролцогч уулзалтын үеэр тохиролцоонд хүрсэн зүйл бага гэж үзэж сэтгэл дундуур байгаагаа илэрхийлсэн байна. Мөн хүлэмжээс ялгарах хий нэмэгдсээр байна гэж үзсэнээс гадна сая гаруй хүн өсөн нэмэгдэж байгаа уур амьсгалын хямралтай холбоотой эрсдэлд өртөж байна гэжээ. Энэ талаар Уур амьсгал, эрчим хүчний шийдвэр гаргах төвийн дэд захирал Эллиот Дирингер “Нью Йорк таймс” сонинд “Ерөнхий геополитикийн нөхцөл байдлаас үзэхэд их хатуу шийдвэр юм. Энэ шийдвэр нь Парисын гэрээг хөгжүүлэхэд бидэнд шаардлагатай бүхнийг санал болгож байна” гэж ярьжээ. Эх сурвалж: Зууны мэдээ сонин