Т.САЙХАН Ёс зүйн дэд хороо өнөөдөр /12.12/ хуралдаж, ЖДҮХС-гаас зээл авсан гишүүдийн асуудлыг хэлэлцэхээр болсон.  Гишүүдийн ирц бүрдээгүй шалтгаанаар өмнө нь хоёр ч хуралдаагүй хойшилсон юм.  УИХ-ын Ёсзүйн дэд хорооны дарга С.Бямбацогтоос тодруулав. - Ёс зүйн дэд хороо хуралдах  шаардлагатай байгаа ч  ирц бүрдэхгүй байна. Өнөөдөр хуралдах уу? -Өнөөдрийн хуралдааны ирц хүрэх байх гэж найдаж байна. Ёс зүйн дэд хорооны дүрэмд заасаны дагуу асуудлыг хэлэлцэнэ. Нэр бүхий иргэд, УИХ-ын гишүүдээс өргөдөл, гомдол ирсэн.Мөн ТББ-аас санал ирсэн. Энэ бүхнийг хэлэлцэж Ёс зүйн дэд хороо шийдвэрээ гаргана. Мөн бид Прокурорын байгууллага руу бичиг явуулж холбогдох хариуг нь авсан. 60 тэрбумын хэрэг, ЖДҮ-гийн зээлтэй холбогдсон гишүүдтэй холбоотой асуудалд холбогдох бичгүүд явуулж хариу нь ирсэн. Үүнийг Ёс зүйн дэд хороогоор танилцуулна. Ёс зүйн дэд хорооны гишүүд ямар шийдвэр  гаргахыг би урьдчилж хэлэх боломжгүй. Хоёрдугаарт, УИХ-ын нэр бүхий гишүүдэд тодорхой гомдол өргөдөл ирсэн .Мөн энэ асуудлыг ч хэлэлцэнэ. -Ирц хүрэхгүйтэй холбогдуулан Ёс зүйн дэд хорооны гишүүдийг солих асуудлыг УИХ-ын дарга хөндөн тавьсан? -Ёс зүйн дэд хорооны гишүүдийг солих эсэхийг Төрийн байгуулалтын байнгын хорооны хуралдаанаар оруулж шийддэг. Энэ бол байнгын хорооны л асуудал. -Ёс зүйн дэд хороогоор ЖДҮХС-гийн зээлтэй холбоотой  хэдэн гишүүний асуудлыг хэлэлцэх вэ? -Энэ талаар надад тодорхой хэлэх зүйл алга. Холбогдох байгууллагуудаас албан бичиг явуулж  мэдээлэл авсан. Ёс зүйн дэд хороо хууль сахиулах байгууллагын харьяаллын дагуу шалгаж байгаа хэргүүдэд давхар хянан шалгах ажиллагаа явуулах боломжгүй.  Эх сурвалж:www.polit.mn