Д.АРИУН   Арменийн Ерөнхий сайдын үүрэг гүйцэтгэгч Никола Пашиняны тэргүүлсэн “Миний алхам” эвсэл тус улсын парламентын ээлжит бус сонгуульд тэргүүлж байгаа талаар Сонгуулийн төв комисс нь мэдээлжээ.  Сонгуулийн 2010 санал хураах байрны дүнг тоолсны дараах дүнгээр тус эвсэл сонгогчдын 70,43 хувийн саналыг авсан бол, тус улсын томоохон бизнесмэн Гагик Царукяны тэргүүлсэн “Хөгжиж буй Армени” нам 8,27 хувийн саналаар удаалж, “Соён гэгээрсэн Армени” 6,37 хувийн санал авсан гэдгийг Сонгуулийн төв комиссын мэдээнд дурджээ. Арменийн засгийн эрх барьж байсан Бүгд найрамдах нам 4,7 хувийн санал авч, парламентад суудал авч чадсангүй. Арменийн хуулиар намууд 5 хувийн босго давж байж парламентад суудалтай болдог. Харин эвсэл болж сонгуульд оролцож байгаа бол энэ босго 7 хувь давах ёстой байдаг аж. Энэ удаагийн ээлжит бус сонгууль нь тус улсын түүхэнд анх удаа болж байгаа бөгөөд хоёр эвсэл, есөн нам өрсөлджээ. Сонгуулийн санал хураалт ням гаригт болсон юм. Эх сурвалж: polit.mn