Д.АРИУН Европын улс төрийн хүрээнд хүлээлт үүсгэж байсан үйл явдал болох ХБНГУ-ын Христийн ардчилсан холбоо намын их хурал өнгөрсөн бямба гариг буюу арванхоёрдугаар сарын 8-нд болж, тус намыг 18 жил удирдсан Ангела Меркелийг халааг авах удирдагчаар  Аннегрет Крамп-Карренбауэр  тодорлоо. Христийн ардчилсан холбоо намын даргын суудлын төлөө намын ерөнхий нарийн бичгийн дарга Аннегрет Крамп-Карренбауэр, Эрүүл мэндийн сайд Йенс Шпан, Бундестаг дахь ХАХ/ХНХ жигүүрийн (фракцын) тэргүүн асан Фридрих Мерц нар өрсөлдсөн юм. Намын шинэ даргыг сонгох санал хураалт хоёр шаттай болж, сүүлчийн шатанд Аннегрет Крамп-Карренбауэрийг 517 төлөөлөгч дэмжсэн санал өгсөн байна. Хатагтай Аннегрет Крамп-Карренбауэр өмнө нь өөрийн төрсөн нутаг Саар мужийн ерөнхий сайдын албыг хашиж байсан ч Ангела Меркелийн саналын дагуу энэ албан тушаалаа орхиж, Берлинд ирж намын ерөнхий нарийн бичгийн даргаар ажилласан байна. Тиймээс түүнийг намын даргын төлөө өрсөлдөхөөр болоход “Мини Меркель”, “Канцлерийн хуулбар” гэх мэтчилэнгээр шүүмжилж байсан билээ. Намын даргын сонгуульд ялсаныхаа дараа “Христийн ардчилсан холбоо нам хүчтэй байх нь Германд, Европт төдийгүй дэлхий дахинд хэрэгтэй” гэж хэлсэн хатагтай Аннегрет Крамп-Карренбауэр амьдрал түүнийг ямар болгосон тэр хэвээрээ л байгаагаа онцолсон байна. Хатагтай Аннегрет Крамп-Карренбауэр Дотоод хэрэг, Боловсрол, Нийгмийн асуудал хариуцсан сайд, мужийн Ерөнхий сайдын алба хашиж байсан улс төр нийгмийн ажлын туршлагатай нэгэн. Мөн гурван хүүхдийн ээж. Христийн ардчилсан холбоо намыг Ангела Меркель 2000 оноос хойш удирдсан. Гэвч сүүлийн сонгуулиудаар намын нэр хүнд унаж, эвслийн засгийн газар байгуулсан, цагаачлалын талаар түүний явуулж байгаа бодлого ихээхэн шүүмжлэл дагуулах болсон. Ангела Меркель намын даргын суудлын төлөө, мөн 2021 онд Холбооны канцлерийн төлөө ч өрсөлдөхгүй, гэхдээ 2021 он хүртэл олоо хашиж байгаа Канцлерийн албан тушаалаа хашина гэдгээ өнгөрсөн аравдугаар сард мэдэгдсэн. Намын даргын хувьд Ангела Меркелийн халааг авч байгаа хатагтай Аннегрет Крамп-Карренбауэрт энэ албан тушаал нь ирээдүйд Канцлерийн суудлын төлөө өрсөлдөх боломжийг түүнд олгож байгаа юм. Христийн ардчилсан холбоо намын ерөнхий нарийн бичгийн даргаар 33 настай Пауль Цимиак сонгогдлоо. Түүний төлөө төлөөлөгчдийн 62 хувь нь саналаа өгсөн байна. Пауль Цимиак нь Христийн ардчилсан холбоо намын залуучуудын байгууллагыг тэргүүлж байсан аж. Эх сурвалж: polit.mn