Ч.ГАНТУЛГА Энэ удаагийн “Миний мэргэжил” буландаа Монгол Улсын соёлын элч, гавьяат жүжигчин, “Бостон балет” компанийн гоцлол бүжигчин Д.Алтанхуягийг урилаа.    

“Бүжигчин болоогүй бол киноны мэргэжлээр сурах байлаа”

  Д.Алтанхуяг Монголын бүжгийн урлаг, бүжигчдийн ур чадварыг дэлхийд сурталчилж буй цөөхөн уран бүтээлчийн нэг юм. Тэрээр дэлхийн алдарт “Бостон балет” компанийн гоцлол бүжигчин. Гэр бүлийн хамт нүүдлийн шувуу шиг амьдарч, тивээс тивийн хооронд тоглолтод оролцлог гэж бодохоор бахархахгүй байхын аргагүй. Тэгвэл түүний урлагийн хүн тэр тусмаа бүжигчин болох хүсэл мөрөөдөл гэр бүлээс нь улбаатай аж. Учир нь аав Дугараа нь бүжигчин. Тиймээс аавыгаа дагаж, Ховдын театрт очдог байсан нь бяцхан хүүгийн сэтгэлд гэгээн дурсамж үлдээжээ. Энэ тухайгаа “Аав маань Ховд аймгийн Булган сумын хүн байсан.  Насаараа аймгийн Хөгжимт драмын театрт ажилласан. Тухайн үеийн театрын хүмүүс бүх зүйлд оролцдог байсны жишгээр аав маань дуугаа дуулж, хөгжмөө хөгжимдөж, хөөмийлж, биелэдэг байлаа. Харин ээж Кино механикч мэргэжилтэй.Тиймээс би кинонд их дуртай. Жаахан байхдаа ээжийгээ дагаад гаргасан кино бүрийг нь алгасахгүй үздэг байж билээ. Магадгүй бүжигчин болоогүй бол киноны мэргэжилтэй болох байсан байх” гэсэн юм.  

“Хөдөлмөр хүнийг хоосон орхидоггүй”

Д.Алтанхуяг 2002 оноос Япон улсын Асами Маки, Комаки балетад ажиллаж эхэлсэн юм. Харин одоо дэлхийн хамгийн шилдэг бүжигчдийн цугласан “Бостон балет” компанийн нүүр царай. Түүнээс мэргэжлээ хэрхэн сонгож байв хэмээн асуухад “Бүжигчин мэргэжил миний хазайж болохгүй хувь тавилан. Багаасаа аавынхаа заасан бүжгээр хот хөдөөгийн уралдаан тэмцээнд оролцдог идэвхитэй сурагч байлаа. Хөдөө сурдаг учир Улаанбаатар, Халимаг гээд том хотод уралдаанд оролцох үнэхээр сайхан санагддаг байсан. Хүүхэд насны минь мөрөөдөл бүжигчин байсан учир сургуульд нь сурахаар шийдээд Хөгжим бүжгийн коллежид шалгуулсан” гэв. Тэрээр мэргэжлээ сонгохоор зэхэж буй хүүхдүүдэд хандаж “Эхлээд өөрийгөө судал. Юунд дуртай гэдгээ мэдэж авах нь хамгийн чухал. Нэгэнт хийх ёстой зүйлээ олсон бол түүнийхээ төлөө шаргуу хөдөлмөрлөдөг байгаарай. Хөдөлмөр хүнийг хоосон орхидоггүй юм” гэлээ. Эх сурвалж: www.polit.mn