Ч.ГАНТУЛГА 31 жилийн түүхтэй “Гоёл” наадам жил бүр дуулиан дагуулдаг. Ялангуяа шинэхэн топ моделиуд. Арга ч үгүй юм. Тэдний тухай шуугианы эхлэлийг 2001 онд мөнхийн залуу хатагтай Э.Одгэрэл тавьчихсан юм. Өдгөө наадмаа хүндэтгэж, жил бүр топ моделийн шагнал гардуулдаг эрхэм хатагтай загварын карьераас эхлээд хувийн амьдралаараа адармаатай, алдартай нэгэн. Тиймээс ч хэвлэлийн хуудсаас эхлээд цахим ертөнцийн “Од” хэвээр байна. Анхны топ моделийн дуулиан тасардаггүй учир загвар сонирхогчид энэ жил ямар модель “Топ”-оор шалгарах бол гэж чих тавьдаг. Э.Одгэрэлийн араас Д.Пүрэвсүрэн, Г.Уранцэцэг, Э.Сэлэнгэ зэрэг зартай бүсгүйчүүд бий. Нэгэн үе “Гоёл” наадмын нэр хүнд унасан үе бий. “Монгол газар” компанийн захирал Ц.Мянганбаярын ээлжит бүсгүй “Топ модель” болдог гэх хандлага нийгэмд байв. Харин 2014 онд “Гоёл” наадамд эргэлт гарсан нь хэний ч таамаглаагүй “битүү морь”, гэр бүлтэй бүлтэй бүсгүй энэ эрхэм шагналын эзэн болсон нь С.Ариунбилэг байлаа. Тэрээр “Би энэ шагналыг авна гэж төсөөлөөгүй. 12 жил загварын ертөнцөд үнэнч байсныхаа үр шимийг хүртлээ. Намайг үргэлж дэмждэг гэр бүлийнхэндээ баярлалаа” гэж сэтгэгдлээ илэрхийлж байв. Энэ үеэс үзэгчид “Гоёл” наадмыг арай өөр өнцгөөс хардаг болсон. Үүний дараа 2015 онд мөн л гэр бүлтэй бүсгүй “Гоёл” наадмыг өнгөлөв. “Андра модель” агентлагийн захирал Х.Бадамгэрэл энэ салбартаа нэртэй. Түүний хань нь дуучин Бэки. Гэргийгээ “Топ модель” болоход тайзан дээр тэвэр дүүрэн цэцгийн баглаа бэлэглэж, сэтгэл нь их хөдөлсөн харагдсан. Харин 2016, 2017 онд модель Х.Уянга, Т.Халиун нарыг “Топ модель” болоход гайхах, баярлах хүн олон байсан. Тэд ч ялгаагүй үзэгчдийн таамаглалыг эвдсэн “Битүү морь” байсан. Харин энэ жилийн”Топ модель”-иор хэн шалгарах бол. Үзэгчдийн санал асуулгаар загвар өмсөгч О.Ариунзул, А.Туяамаа, Д.Долгион нар хамгийн өндөр ритенгтэй явж байна. Загвар өмсөгч О.Ариунзул “Шилмэл загвар” компанид харъяатай. Хүмүүнлэгийн ухааны их сургуулийг төгссөн. Түүний амжилтын гараа 2007 оноос эхэлжээ. Аймгийнхаа “Үнсгэлжин” тэмцээний “Өсөх ирээдүйтэй шилдэг загвар өмсөгч” болж байсан юм.  Тухайн үед 13 настай жаахан охин шилдэг загвар өмсөгч болчихоод “Хаврын гоёл” наадамд оролцох эрхийн бичгээр шагнуулж байжээ. Харин энэ цагт түүнийг дуучин Б.Амархүүгийн гэргий гэдгээр нь үзэгчид илүү таньдаг болжээ. А.Туяамаагийн хувьд гадны зах зээлд амжилттай яваа монгол моделийн нэг. Тэрээр саяхан Германы нэр бүхий сэтгүүлийн хуудсыг монголжингоо төрхөөрөө чимээд амжсан. Түүний амжилтын гараа “Азийн модель” агентлагтай салшгүй холбоотой. Мисс С.Содтуяад шавь орсноор мэргэжлийн загварын тайзнаа алхаж эхэлсэн гэдэг. “Мисс Монголиа-2010” тэмцээний “Авьяаслаг мисс”, “Манжуурын гоо бүсгүй” тэмцээний гуравдугаар байр, Солонгосын “Керасис” бүтээгдэхүүний нэрэмжит “Шилдэг загвар өмсөгч” шагналын эзэн, 2011 онд “Азийн супер модель” шагналын эзэн зэрэг баялаг намтартай бүсгүй. Харин 2012 оны “Монголын мисс” Д.Долгион багаасаа загвар өмсөгч, мисс болохыг хүсдэг байжээ. Тэрээр өнгөрсөн жил “Шилдэг загвар өмсөгч”-өөр шалгарсан. Үүнээс гадна олон улсын тэмцээнүүдэд амжилттай оролцож, эх орныхоо нэрийг дуурсгасаар яваа юм. Д.Долгион ирэх сарын 16-нд болох “Miss universe” тэмцээнд оролцохоор Тайланд улсыг зорих юм. Одоогийн байдлаар үзэгчид цахим ертөнцөд отгон “Топ модель”-д эдгээр гурван загвар өмсөгчийг нэрлэж байна. Гэвч эцсийн шийдвэр хэрхэн гарахыг хэн ч мэдэхгүй. Магадгүй үзэгчдийн таамаглалыг эвдэж, “Битүү морь” түрүүлэх ч юм бил үү. Эх сурвалж: www.polit.mn