Ч.ГАНТУЛГА Монголын түүх, шашин, соёл урлагийн гайхамшигт өв болсон Чойжин ламын сүм музей 110 нас хүрч байна. Ойн хүрээнд олон ажил зохион байгуулсны нэг нь өнөөдөр Уран зургийн галерейн хурлын танхимд болсон “Дурсгалт барилгын сэргээн засварлалт: Тулгамдаж буй асуудлууд” сэдэвт хэлэлцүүлэг байсан юм. Хэлэлцүүлэгт музейн захирал, ажилчдаас гадна “Соёлын өвийн үндэсний төв”, мэргэжлийн архитектор инженерүүд оролцож илтгэл тавилаа. Тус музейн захирал Д.Отгонсүрэн “Бид Чойжин ламын тэгш ойд зориулан 1940-2018 он хүртэлх түүхэн архив, баримт бичигт тулгуурлан “Чойжин ламын сүм музейн дурсгалт барилгын сэргээн засварлалт” нэртэй эмхэтгэлийг олон нийтийн хүртээл болгож байна. Музей байгуулагдсанаас хойш хэсэгчилсэн засвар орж байсан боловч бүрэн засвар ороогүй. Монголын нэгэн цагийн түүхийг гэрчлэх музейг яаралтай сэргээн засварлах ажлыг эхлэх хэрэгтэй” гэв.    Дурсгалт барилгын сэргээн засварлалтын зөвлөх архитектор З.Оюунбилэг “Монгол Улсад 1971 онд Соёлын зүйлийг хамгаалах хууль гэж батлагдсан. Хуулийн дагуу Соёлын яамны харьяа Соёлын дурсгалт зүйлсийг хамгаалах сэргээн засварлах байгууллага гэж байгуулагдсан боловч 1995 онд хувьчлагдсан. Энэ хугацаанд Монголын нутаг дэвсгэрт байгаа түүхэн дурсгалт газруудыг сэргээн засварлах ажлыг хийсэн байдаг. Өнөөдөр мэргэжлийн архитектор ховор байна” гэсэн юм. Одоогоор Чойжин ламын сүм музей Захиргаа аж ахуй, сан хөмрөг, эрдэм шинжилгээ гэсэн бүрэлдэхүүнтэй. Музейд түүх шашин, соёл урлагийн үнэт өв болох 6000 гаруй үзмэр хадгалагдаж байгаа юм. Музейг яаралтай сэргээн засварлаж, эдгээр үзмэрийг хамгаалах шаардлагатайг хэлэлцүүлэгт оролцсон мэргэжлийнхэн онцолж байв. Эх сурвалж:www.polit.mn