С.САРУУЛ Өмнөговь аймгийн Тавантолгойгоос Гашуунсухайт боомтод  Хятадын тал нүүрс таталтаа багасгаснаас болж 80 км-т 5000 машины дараалал үүсч нөхцөл байдал хүндрээд байгаа юм. Тэгвэл нүүрсний тээврийн үйл ажиллагаа, хил нэвтрэлттэй холбоотойгоор Өмнөговь аймгийн Засаг дарга Н.Наранбаатараар ахлуулсан албаны хүмүүс БНХАУ-ын ӨМӨЗО-ны Баяннуур аймаг, Ганцмод боомтын удирдлагуудтай уулзалт хийжээ. Гашуунсухайт боомтын хил, гааль, хяналтын байгууллагуудын төлөөлөл,  ӨМӨЗО-ны Баяннуур аймгийн удирдлагууд, Ганц мод боомтын хил, хяналтын байгууллагуудын хамтарсан уулзалтыг Ганц мод боомтод хийсэн байна. Уулзалтаар Тавантолгойгоос Гашуунсухайт боомт хүртэлх зам дээр үүссэн нүүрсний автомашинуудын очер дарааллыг бууруулах асуудлаар ярилцаж 2018.11.24-ний өдрөөс эхлэн тодорхой хугацаагаар хилийн боомтын цагийн хуваарийг  21:00 цаг хүртэл ажиллуулахаар тохирч, мөн 25 –ны амралтын өдөр  боомтыг ажиллуулахаар хоёр талын холбогдох байгууллагуудад санал тавих мөн зам дээр дараалалд зогсож байгаа 5000 орчим машиныг хятадын хил рүү хурдан татаж оруулах асуудлыг хөнджээ. Энэ талаар Өмнөговь аймгийн Засаг дарга Н.Наранбаатар “Зам дээр очер дараалал үүссэн асуудал нь Хятадын гааль ухаалаг хаалганы систем суурилуулж, хилээр орсон бүх автомашиныг нэг бүрчлэн шинэчилсэн бүртгэлд хамруулж, мэдээллийг нь чиптэй картанд оруулж машин бүрт нааж өгч байгаатай холбоотой бөгөөд энэ ажлыг ирэх сарын эхээр хийж дууссанаар цаашид хэвийн үйл ажиллагаанд шилжих боломжтой болох юм байна. Хятад талын таталт сайжирч 500 давлаа.Орон нутгийн зүгээс урт очерт байгаа машинуудыг замаас буулгаж парклах, машиндаа олон хоносон жолооч нарыг амраах ажлыг зохион байгууллаа. Дараалалд удаан зогссоноос даарч хөрөх, өлсөж цангах, түлш шатахуунаа үрээх, эмх замбараагүй байдал бий болох зэрэг асуудал гарч байна. Мөн Цагаан хаданд тодорхойгүй хугацаагаар архи, согтууруулах ундаа зарахыг хориглолоо. Тээврийн компаниуд энэ ажилд идэвхитэй оролцох хэрэгтэй” гэж мэдэгдлээ. Эх сурвалж: www.polit.mn