Д.АРИУН Олон улсын эрүүгийн цагдаагийн байгууллага Интерполын Ерөнхийлөгчийн сонгууль өнөөдөр /2018.11.21/ болж, Өмнөд Солонгосын төлөөлөгч Ким Жон Ян сонгогдсон байна. Арабын нэгдсэн Эмират улсын нийслэл Дубай хотноо тус байгууллагын 87 дугаар ассамблей болж байгаа юм. Ким Жон Ян нь Интерполын тэргүүн дэд ерөнхийлөгч байсан бөгөөд аравдугаар сарын эхээр албан тушаалаасаа огцорсон Мэн Хунвейн оронд Ерөнхийлөгчийн үүрэг гүйцэтгэгчээр ажиллаж байсан юм. Дэлхийн 192 орныг эгнээндээ нэгтгэсэн олон улсын эрүүгийн цагдаагийн байгууллагын  шинэ тэргүүн нь өмнөх Ерөнхийлөгчийн бүрэн эрхийн хугацааг дуустал буюу 2020 он хүртэлх хугацаагаар сонгогдож байгаа аж. Интерполын тэргүүний суудлын төлөө одоо дэд ерөнхийлөгчөөр ажиллаж байгаа Оросын төлөөлөгч хошууч генерал Александр Прокопчук мөн нэр дэвшсэн юм. Гэвч АНУ болон Украйны зүгээс хүчтэй эсэргүүцэлтэй тулгарч, АНУ-ын сенатын зарим гишүүн ил захидал хүртэл бичсэн билээ. АНУ-ын зүгээс хүний эрхийн төлөө тэмцэгчид, сэтгүүлчид, сөрөг хүчнийхнийг мөрдөн мөшгихдөө Интерполыг ашигладаг хэмээн Оросыг буруутгаж байгаа. Харин ОХУ-ын зүгээс энэ бүх буруутгалыг үгүйсгэж, АНУ-ын сенатын гишүүдийн захидлыг олон улсын байгууллагын үйл ажиллагаанд хөндлөнгөөс нөлөөлөх оролдлого гэж мэдэгдсэн билээ. Александр Прокопчук  Интерполын ерөнхийлөгчөөр сонгогдож чадаагүй ч гэсэн 2020 он хүртэл тус байгууллагын дэд ерөнхийлөгчөөр үргэлжлүүлэн ажиллах юм байна. Эх сурвалж: www.polit.mn