Фото:ОХУ-ын Дотоод хэргийн яамны хэвлэлийн алба

Интерполын дэд ерөнхийлөгч  Александр Прокопчук

Д.АРИУН Интерполын дэд ерөнхийлөгч Александр Прокопчук тус байгууллагын тэргүүний төлөө өрсөлдөхөө мэдэгдсэн талаар өнгөрсөн баасан гаригт Financial Times (FT) мэдээлжээ. Прокопчук нь 2011 оноос ОХУ-ын Дотоод хэргийн яамны Интерполын үндэсний товчооны даргаар ажиллаж байсан бөгөөд 2016 оноос Олон улсын эрүүгийн цагдаагийн байгууллагын дэд ерөнхийлөгчийн албыг хашиж байгаа юм. Интерполын тэргүүний төлөө Прокопчуктай өрсөлдөгч нь Солонгосын Ким Чен Янг юм. Тэргүүн дэд ерөнхийлөгчийн албыг хашиж байсан тэрээр одоо тус байгууллагын Ерөнхийлөгчийн үүрэг гүйцэтгэгчээр ажиллаж байгаа. Financial Times-ийн мэдээлснээр, Интерполын ерөнхийлөгчийн сонгууль энэ лхагва гаригт болох аж. Мөн Францын цагдаагийн газраас Интерполын Ерөнхийлөгч асан Мэн Хунвэй сураггүй алга болсонтой холбоотой үүсгэсэн хэргийг хаасан нь өнгөрсөн долоо хоногт тодорхой болсон. Мэн Хунвэй нь есдүгээр сарын 27-нд Францын Лион хотоос БНХАУ руу яваад сураг тасарсантай холбоотойгоор Лион хотын прокурорын газар мөрдөн шалгах ажиллагаа эхлүүлсэн аж. Харин БНХАУ-ын холбогдох албанаас аравдугаар сарын 7-нд  64 настай Мэн Хунвэйг хууль зөрчсөн хэмээн сэжиглэж байгаа бөгөөд хээл хахууль авсан болон өөр бусад хэрэгт холбоотой байж болзошгүй гэдэг үндэслэлээр саатуулсан хэмээн зарласан юм. Үүний дараа түүний эхнэр Грэйс Мэн нөхрийгөө амьд гэдэгт эргэлзэж байгаагаа мэдэгдэж байсан билээ.  Францын хэвлэлүүдийн мэдээлж байгаагаар, мөрдөн шалгах явцад эхнэрийнх нь хэлсэнийг батлах баримт гарч ирээгүй тул хэргийг хаасан гэсэн байна. Эх сурвалж: www.polit.mn