Энэ тухай зарлигт ОХУ – ын ерөнхийлөгч Владимир Путин гарын үсэг зуржээ. Буриад улс © Евгений Епанчинцев/ТАСС

Д.ЭНХЭЭ ОХУ-ын Ерөнхийлөгч Владимир Путин Бүгд найрамдах Буриад улс, Байгалийн чанадын хязгаарыг Сибирийн холбооны тойргийн бүрэлдэхүүнээс Алс дорнодын холбооны тойрогт шилжүүлэх тухай зарлигт гарын үсэг зурсан талаар ТАСС агентлаг өчигдөр /2018.11.05/ мэдээлжээ. "Холбооны тойргуудын бүрэлдэхүүнд дараахь өөрчлөлт оруулсугай: ...”Алс дорнодын холбооны тойрог: Бүгд найрамдах Буриад улс, Бүгд найрамдах Саха (Якут) улс, Байгалийн чанадын хязгаар, Камчаткийн хязгаар, Приморийн хязгаар, Хабаровын хязгаар, Амур муж, Магадан муж, Сахалин муж, Еврейн өөртөө засах муж, Чукоткийн өөртөө засах муж” хэмээн эрх зүйн мэдээллийн албан ёсны интернет – порталын нийтлүүлсэн баримт бичигт дурджээ. Гурван сарын хугацаанд өөрийн актуудыг уг зарлигт нийцүүлэн өөрчлөхийг Засгийн газарт даалгасан байна. Үүнээс гадна Ерөнхийлөгчийн захиргааны удирдагч (тамгын газрын дарга) Сибирийн болон Алс дорнодын холбооны тойргууд дахь Ерөнхийлөгчийн бүрэн эрхт төлөөлөгчийн газрын бүтэц, орон тоог баталж, уг зарлигийг хэрэгжүүлэхэд чиглэсэн орон тоо, зохион байгуулалтын арга хэмжээ авч хэрэгжүүлэх ажээ. Есдүгээр сарын сүүлээр Алс дорнодын холбооны тойрог дахь ерөнхийлөгчийн бүрэн эрхт төлөөлөгч, Ерөнхий сайдын орлогч Юрий Трутнев Алс дорнодын хөгжлийн хөтөлбөрт Байгал орчмын зарим бүс нутгийг хамруулж оруулах тухай илтгэлийг ОХУ-ын Ерөнхий сайд Дмитрий Медведевт өргөн мэдүүлсэн тухай өмнө нь мэдээлж байсан. Аравдугаар сарын сүүлээр Байгалийн чанадын хязгаарын амбан захирагчийн үүргийг түр орлон гүйцэтгэгчээр Алс дорнодын хязгаарын хөгжлийн асуудлыг хариуцдаг байгууллага болох ОХУ-ын Дорнын хөгжлийн яамны тэргүүн дэд сайдаар ажиллаж байсан Александр Осипов томилогдсон билээ. Эх сурвалж: www.polit.mn