Ц.БАЯР Хууль зүйн үндэсний хүрээлэнгээс өнөөдөр /11.06/ “Байгалийн нөөцийн тогтвортой удирдлагыг хангах байгаль орчны засаглал” төслийн хүрээнд  “Уул уурхайн үйл ажиллагаатай холбоотой байгаль орчны эсрэг гэмт хэрэг, зөрчлийг бууруулахад тулгамдаж буй асуудал, түүнийг шийдвэрлэх арга зам” сэдвээр хийсэн судалгааны мэдээллийг иргэний нийгмийн байгууллага, хуульчид, судлаачид, холбогдох яамны мэргэжилтнүүдийн  дунд хэлэлцүүлэв. 2016 онд уул уурхайн зориулалтаар 27068 га талбай эвдрэлд орсноос 11375 га-д буюу 42.2 хувьд техникийн нөхөн сэргээлт, 7425 га буюу 27.4 хувьд биологийн нөхөн сэргээлт хийсэн. Харин уурхайн үйл ажиллагаанаас эвдэрсэн 8.268 га талбайд нөхөн сэргээлт хийгдээгүй. Түүнчлэн сүүлийн арван жилийн хугацаанд хүрээлэн буй байгаль орчны эсрэг  530 гэмт хэрэг бүртгэгдэж үүнээс 306 нь хууль бусаар ашигт малтмал хайх, ашиглах, олборлох болон нөхөн сэргээлт хийгээгүй гэмт хэрэг байна. 25-27 хувь нь гэмт хэрэг болох нь тогтоогдож шүүхэд шилжсэн байхад харин хэрэгсэхгүй болсон   бүртгэлийн хэргийг хаасан зэрэг хэрэг 60 хувийг эзэлж байна  гэж  дээрхи сэвдээр судалгаа хийсэн хуульч Б.Мөнхтогтох судалгаагаа танилцуулах үеэр онцлов. Энэ төрлийн хэргүүдийн ихэнх нь  хэрэгсэхгүй болж эсвэл хаагдаж байгааг тэрээр тайлбарлахдаа “Байгаль орчныг хамгаалах багц хуулийг хэрэгжүүлэх эрх зүйн орчин бүрдсэн ч хэрэгжилт хангалтгүй байна.  Өөрөөр хэлбэл, уул уурхайгаас үүдэлтэй  байгаль орчинд учирч буй хохирол, түүний шалтгаан нөхцлийг тогтоож буруутай этгээдэд хариуцлага тооцож хохирлыг арилгуулах үүргийг төрийн хяналтын байгууллагууд хангалтгүй хийж байна” гэлээ. Иймд байгаль орчны засаглал, хууль эрх зүйн зохицуулалтыг сайжруулах нь гэмт хэргийн илрүүлэлтэд сайнаар нөлөөлнө гэдгийг холбогдох газруудад зөвлөв. Эх сурвалж:www.polit.mn