Ч.ЗОТОЛ Монголын тайз, дэлгэцийн урлагийн гарамгай зүтгэлтэн, нэрт найруулагч, жүжигчин Г.Доржсамбуу агсны амьдрал, уран бүтээлийн тухай хөрөг дурсамжийн “Арслан” номыг “Зохист дорно” хэвлэлийн газраас эрхлэн гаргажээ. Номд найруулагч Г.Доржсамбуу агсны гэр бүл, ах дүү, төрөл төрөгсөд болон мэргэжил нэгт найз нөхөд, хамтран зүтгэгчид, театр урлагийн зүтгэлтнүүд, шавь нарынх нь дурсамжаас  зохиомжлон хувь хүний намтрыг өгүүлсэн  байна. Ингэхдээ түүний оюутан ахуй цаг, урлагт зүтгэсэн он жилүүд, театрын урлагт түүчээлсэн үе гээд амьдрал, уран бүтээлийн  бүрэн цогц товчооныг нийтлэл, уран сайхны аргаар бүтээжээ. Ирэх жил нэрт найруулагч Г.Доржсамбуу агсны мэндэлсний 70 жилийн ой тохиох бөгөөд “Арслан” хөрөг дурсамжийн номыг түүний  ойд зориулан бүтээсэн юм байна. Нэрт найруулагч Г.Доржсамбуу 1949 оны гуравдугаар сарын 22-нд Улаанбаатар хотод төржээ. 1966 онд театрт хөл тавьж, дагалдан жүжигчнээр ажиллаж байгаад цэргийн албанд мордсон байдаг. Цэргээс халагдсаныхаа дараа ажилдаа эргэн орж, 1971 оны дөрөвдүгээр сарын 19-нд УДЭТ-ын үндсэн жүжигчин болж, уран бүтээлийнхээ гарааг эхлүүлжээ. Тэрээр 1973 онд Д.Мягмарын “Нандин эрдэнэ” жүжгийн Жанцан, 1974 онд Армяны зохиолч А.Папаяны “Цаг өөр болжээ” жүжгийн Эдуард, 1975 онд төрийн шагнал, зохиолч Ч.Чимидийн “Маш нууц” жүжгийн Жамьяндоогийн дүрд  тоглосон юм ЗХУ-ын Украйн улсын Киев хотын Театрын дээд сургуульд суралцан төгссөнийхөө дараа тухайн үеийн УБДС-ийн Кино драмын ангид багшлан олон арван авьяаслаг шавь нарыг бэлтгэн гаргасан сурган хүмүүжүүлэгч байв. Түүний дааж төгсгөсөн ангийнх нь шавь нараас Д.Цэрэнсамбуу, Ч.Ганхуяг, Н.Пүрэвдорж нарын урлагийн гавьяат зүтгэлтнүүд, С.Лхагвасүрэн, Ж.Алтанцэцэг нарын гавьяат жүжигчид төрөн гарсан бөгөөд хичээл заалгасан болон удирдлагад нь ажиллаж байсан жүжигчдээс Ж.Сүххуяг, Ц.Төмөрхуяг, Л.Дэмидбаатар нарын олон гавьяатууд төрөн гарчээ. Эх сурвалж: www.polit.mn