Ч.Зотол Авлигатай тэмцэх газрын Хяналт шалгалт, дүн шинжилгээний хэлтсийн дарга Х.Хашбаатараар ахлуулсан Ажлынхэсэг Сүхбаатар аймагт ажиллахдаа авлигын шинжтэй таван хэргийг илрүүлэн шалгалтын ажлыг эхлүүлжээ. Шалгалтын явцад аймаг, сумын ИТХ болон ИТХ-ын тэргүүлэгчид нь хуулиар олгогдоогүй эрх эдэлж, орон нутгийн татвар, төлбөр хураамжийн хэмжээг дур мэдэн тогтоосон зөрчлүүд ил болжээ. Мөн хүчингүй болсон шийдвэрийг үндэслэж, иргэдээс хууль бус төлбөр хураамж авсан явдал  цөөнгүй бүртгэгдсэн байна. Сум хөгжүүлэх сангийн чанаргүй зээлийн хэмжээ сум бүрт 30-40 хувьтай, үүнд хяналт тавьж ажилладаггүй, түүнчлэн зээлийг өөрийн хамаатан саданд олгосон тохиолдол ч байна. Мөн   Засаг даргын нөөц хөрөнгөөс аймагт ирсэн төрийн өндөр дээд албан тушаалтнууд, дагалдан яваа 70 гаруй хүнд хүндэтгэл үзүүлэх нэрийдлээр зочид төлөөлөгчдийн хоол, буудлын зардлыг даах зэргээр зориулалтын дагуу зарцуулаагүй, төсвийн хөрөнгөд хэт үрэлгэн хандсаныг шалгалтаар  тогтоожээ.  Ажлын хэсгээс зөвлөмж өгсний дээр авлигын шинжтэй таван үйлдэлд бүртгэлийн хэрэг нээн шалгаж эхэлжээ. Эх сурвалж:www.polit.mn