М.БААСАНДЭЛГЭР Сүүний фермер, боловсруулах үйлдвэрүүд, мэргэжлийн холбоод хамтран сүү үйлдвэрлэлийн салбарыг шинэ үе шатанд гаргах, өнөөгийн нөхцөл байдлыг бодитоор үнэлэх, сүүний салбарыг цогцоор нь шинэчлэн өөрчлөхөд төрийн бодлогоор дэмжих, гарц боломжийн талаар “Сүүний салбарын шинэчлэл-Тогтвортой бэлтгэн нийлүүлэлт” чуулга уулзалтыг маргааш /02.07/ 14.00 цагаас Нийслэлийн Залуучуудын соёлын төвд зохион байгуулах гэж байна. Энэхүү чуулганаар дотоодын сүүний үйлдвэрлэл хангалттай биш байдаг. Нийт хэрэглэж байгаа сүүнийхээ 80 гаруй хувийг импортоор авдаг. Дотоодоосоо энэ хэрэглээг хангах гол арга нь дөрвөн улиралд тасралтгүй үнээний цэвэр сүүг үйлдвэрлэх юм. Олон улс ч энэ аргыг хэрэглэдэг. Тиймээс энэ талаар хэлэлцэж, түүний үр дүнд төр засгийн байгууллагуудад хандаж хүсэлт гаргах гэнэ.Монголын сүүний нэгдсэн холбооны тэргүүн О.Амарцэнгэл “Төр засгаас үр дүнтэй дэмжлэг үзүүлэх юм бол бэлтгэн нийлүүлж байгаа түүхий сүүний үнийг бууруулах боломжтой. Технологио сайжруулж, эрчимжсэн мал аж ахуйн эдийн засгийн үр ашгийг дээшлүүлснээр зах зээлд борлуулж байгаа сүүний үнэ буурна. Энэ жил хадлангийн бүс нутгуудаар гантай байгаа учраас боодол өвсний үнэ 8-12 мянга хүрсэн. Үүнийг дагаад дэлгүүрт зарагдаж байгаа задгай сүүний үнэ нэмэгдэж байгаа юм” гэлээ.Манай улсын хэмжээнд 43 мянга орчим үнээ сүүний эрчимжсэн мал аж ахуйд зогсож саалиа өгдөг. Сүүний эрчимжсэн үйл ажиллагаа эрхэлдэг 2000 орчим фермер байдаг. Сэрүүний улиралд ч үнээгээ тэжээж, сүүгээ сааж, зах зээлд нийлүүлэхийг эрчимжсэн мал аж ахуй гэдэг байна. “Нүүдэлчин Агро” фермийн захирал Ж.Баттөгс “Сүү бол хүн амын гол стратегийн бүтээгдэхүүн. Тиймээс энэ чиглэлийн үйлдвэрлэлийг хөгжүүлэх гарц, шийдлийг хайж байна. Төр засгаас “Мах сүүний анхдугаар аян”, “Эрүүл Монгол хүн”, “Сүүтэй монгол” гэх мэт мөрийн хөтөлбөр гаргаж байсан ч тодорхой үр дүнд хүрч чадаагүй. Фермер эрхлэгчид эрчимжсэн мал аж ахуй эрхлэхэд тэжээл тарих нь хуулиар хориотой байдаг. Тэгэхээр бид газар тариалангийн хуулинд өөрчлөлт оруулах замаар фермер эрхлэгчийг үнээний тэжээлд зориулан нэг болон олон наст ургамлын тариалалтыг шийдэж өгөх хүсэлт гаргаж байгаа. Мөн энэ аж ахуйг стандарттай болгох ажил хийж байна” гэсэн юм. Одоогоор манай улсад 64 мянга орчим саалийн үнээ байгаагаас жилд авах саалийн хэмжээ нь 2800-3000 литр байгаа нь олон улсын үзүүлэлтээс 2-3 дахин доогуур үзүүлэлттэй байна. Эх сурвалж:www.polit.mn