2025 оны 5-р сард ОХУ-ын Хабаровск хот Оростой эдийн засгийн түншлэлээ өргөжүүлэн хөгжүүлэх сонирхолтой улс орнуудын анхаарлыг татах цэг болох нь дамжиггүй юм. Амур мөрний эрэг дээр Орос, Хятадын “Большой Уссурийский арлыг хамтран хөгжүүлэх хамтын ажиллагаа” олон улсын чуулга уулзалт анх удаа зохион байгуулагдаж гэж байна. Энэхүү арга хэмжээнд Орос, Хятадын төдийгүй Евразийн хамгийн том эдийн засагтай улс орнуудтай яриа хэлэлцээ хийх сонирхолтой бусад олон орны бизнес, төрийн байгууллага, бүтээлч салбаруудын мянга гаруй төлөөлөгч оролцоно.

Чуулга уулзалтын үеэр өнгөрсөн нэг жилийн хугацаанд хоёр орны нутаг дэвсгэрийн маргаанаас үр бүтээлтэй хамтын ажиллагаа, хөгжих нэгдмэл хүсэл зоригийн билэгдэл болсон Большой Уссурийскийн арлыг хамтран хөгжүүлэх асуудалд гол анхаарлаа хандуулах болно. Арга хэмжээний хүрээнд хоёр орны хамтын ажиллагааны асуудлаар 30 гаруй сэдэвчилсэн уулзалт, бизнес, соёлын арга хэмжээ зохиогдох бөгөөд эдгээрт 1000 гаруй зочид, төлөөлөгчид оролцох юм.

Чуулга уулзалтын оролцогчид олон улсын аж үйлдвэрийн парк, ложистикийн шинэ коридор байгуулах, хөрөнгө оруулагчдад татварын хөнгөлөлт үзүүлэх талаар хэлэлцэхээс гадна соёл урлаг, спорт, залуучуудын салбарт хамтран ажиллах тухай яриа хэлэлцээ өрнүүлнэ.

ОХУ, БНХАУ-тай хил залгаа оршдог, хоёр орны эдийн засагт адил онцгой байр суурь эзэлдэг Монгол Улсын хувьд “Орос, Хятадын аж үйлдвэрийн хамтын ажиллагаа”, “Орос, Хятадын бизнесийн яриа хэлэлцээ” зэрэг сэдэвт хэлэлцүүлгүүдэд оролцож, өөрийн байр сууриа илэрхийлэх нь гурван талт хамтын ажиллагаанд түлхэц өгөх нь дамжиггүй юм. Эдгээр хэлэлцүүлгийн үеэр төмөр замын шинэ чиглэлүүд, түүнчлэн Хятад, Оросыг холбосон “Союз-Восток” транзит хийн хоолой төслүүдийн талаар ярилцахаар төлөвлөсөн байна.

Зөвхөн томоохон бизнесүүд төдийгүй олон улсын зах зээлд гарах сонирхолтой жижиг, дунд үйлдвэрлэгчдэд олон боломжууд гарч ирнэ гэдгийг тэмдэглэх нь зүйтэй болов уу. Чуулга уулзалтын үеэр монголын бизнес эрхлэгчид хөдөө аж ахуй, мал аж ахуйн гаралтай бүтээгдэхүүний импорт, экспортын чиглэлээр шинэ харилцаа холбоо тогтоох боломжтой, ялангуяа хөрөнгө оруулалтын төслүүдийн хэлэлцүүлгийн үеэр, мөн ОХУ-ын "Агроэкспорт" холбооны төвөөс зохион байгуулах уулзалтын үеэр эдгээр асуудлыг хэлэлцэх боломжтой юм.

Ийнхүү анх удаа зохион байгуулагдах гэж байгаа тус эдийн засгийн чуулга уулзалт нь хөрш орнуудын хооронд эдийн засгийн цогц интеграцчлалыг хөгжүүлэхэд шинэ түлхэц өгөхөөс гадна хоёр талын, гурван талын яриа хэлэлцээний түвшинг ахиулах боломжтой юм.