Ч.ГАНТУЛГА

Хөгжмийн ертөнцийн хатан хаан нь хийл хөгжим. Намуухан эгшиг, нарийхан чавхдас нь хүний чихэнд биш сэтгэлд эгшиглэдэг увидастай. Тэгвэл энэ л хөгжмийн аялгуугаар амьдарч яваа хийлч О.Байгалийг “Хобби” буландаа урисан юм. Тэрээр чөлөөт цагаараа аэробикээр хичээллэдэг. Харин хобби нь гутал цуглуулах. Гэхдээ таарсан дэлгүүрээсээ, таалагдсан бүхнээ авдаггүй. Чанарыг эрхэмлэж, эдэлгээг нь хардаг юм байна. Хийлч О.Байгаль “Бүсгүй хүн бүхэн өөртөө цаг гаргаж, гоо сайхандаа анхаарах ёстой” гэж үздэг. Тиймээс гадаад төрх, гоо сайхандаа цагийг харамгүй зориулдаг гэнэ. Тэрээр өндөр өсгийтөөс илүү хөлд эвтэйхэн, цэвэрхэн гуталд дуртай гэсэн. Гэхдээ ажил, мэргэжлийн онцлогоос болоод өсгийтэй гутал олонтой болсон байна. Түүнд зөвхөн гутлуудаа хийдэг шүүгээ бий. Тэрээр гутлаа зун, хавар, намрынх гэж ялгаад тус бүрт нь тасалгаанд тавьдаг гэнэ. Мөн элгэн болон арьсан гутлуудаа тусад нь хадгалдаг ажээ. Харин хэдэн хос гоёлтой болсноо хараахан тоолж амжаагүй гэв. Түүний хавар, намрын сонголтод бор, хар өнгө зонхилдог. Харин зуны улиралд гэгээлэг өнгийн туфелиэр гангарах дуртай. Мөн гадаад явахдаа заавал гутлын дэлгүүрээр ордог гэнэ. Арьсан гутал эдэлгээ урттай, чанартай байдаг учир тэр л сонголтдоо үнэнч байдаг тухайгаа ч ярьсан юм. 

Эх сурвалж: "Зууны мэдээ" сонин