Ц.Батболд

Хууль зүйн сайд Х.Тэмүүжингийн  хүсэлтээр ЦЕГ-ын дарга, бригадын генерал Б.Билэгтийг үүрэгт ажлаас нь чөлөөллөө. Чөлөөлөхийн учир Б.Билэгт салбарын  сайдынхаа   үгэнд  ордоггүй, өөрийн итгэл үнэмшил, байр суурьтаа  хатуу зогсдог нэгэн. Түүгээр ч зогсохгүй дээрээс нь үүрэг өгөөд байхад өөрийнхөөрөө зүтгэдэг  зан чанартай нь холбоотой  үл ойлголцол их байдаг  гэх юм билээ. Өдгөө түүний оронд  ЦЕГ-ын дэд дарга, цагдаагийн хурандаа С.Баатаржавыг үүрэг гүйцэтгэгчээр томилсноор,  тэрээр хэсэгхэн зуур ч гэсэн ажиллах болоод байна. Тэгвэл С.Баатаржав гэж хэн бэ гэдэг асуулт бас  гарна.

Цагдаагийн албанд насаараа ажиллаж байгаа энэ хурандаа Төв аймагт хэсгийн төлөөлөгч байхаас л энэ салбарт  ажлаа эхэлсэн нэгэн юм байна. Хожим Дархан-Уул аймгийн цагдаагийн газрын дарга, Нийслэлийн цагдаагийн газрын дарга, УМБГ-ын дарга болж дэвшин ажилласан байдаг. Гэвч ЦЕГ-ын даргаар  Б.Билэгтийг томилогдсоны   дараа ажилгүйчүүдийн эгнээнд хэсэгтээ нэгдэж байгаад Сэлэнгэ аймгийн цагдаагийн газрын даргаар томилогдсон юм. Гэвч удалгүй Х.Тэмүүжин сайд өөрийн хүнээ Сэлэнгээс татаж ЦЕГ-ын дэд дарга болгосон гэх юм билээ. С.Баатаржав цагдаагийн алба дотроо нэр хүнд сайтай нэгэн гэдгийг мэргэжил нэгт нөхдүүд онцолж байсан юм.