Ч.ГАНТУЛГА

МЗЭ-ийн шагналт, яруу найрагч А.Эрдэнэ-Очиртой холбогдлоо. Тэрээр энэ сарын 21-нд болох дэлхийн яруу найргийн тэмцээнд эх орноо төлөөлөн оролцох юм.

-Сайн байна уу. Уран бүтээлийн олз омог арвин уу?

-Танай сонины уншигчдад энэ өдрийн мэндийг хүргэе. Уран бүтээлийн олз омог арвин шүү. Удахгүй болох дэлхийн яруу найргийн наадамд оролцохоор болсон.

-Хэдэн шүлэг унших вэ?

-Шүлгүүдээ явуулсан. Одоо орчуулчихсан биз. Түүнээсээ л уншина даа. Сүртэй бэлдсэн зүйл алга.

-Энэ наадамд оролцох найрагчдыг яаж сонгодог юм бэ?

-Хүмүүст нэг тайлбар хиймээр байна. Зарим мэдээллийн хэрэгслээр тэмцээн гэж зарласан юм шиг байна лээ. Энэ бол тэмцээн биш, фестиваль юм шүү. Ямар ч өрсөлдөөн байхгүй. Дэлхийн өнцөг булан бүрээс найрагчид ирж шүлгээ уншин, бодол сэтгэлээ хуваалцдаг юм.

-Өмнөх жилийн наадмуудын тухай судалсан уу. Энэ жилийн наадам ямар онцлогтой болох бол?

-Дэлхийн хэмжээнд 53 дахь удаагаа зохион байгуулж буй наадам. Өнгөрсөн жил 160 гаруй найрагч оролцсон юм билээ. Энэ жил ч энэ хэмжээний уран бүтээлч оролцоно гэсэн. Дэлхийн өөр улс, орнуудын утга зохиол, яруу найргийн хөгжлийг дэргэдээс нь мэдрэх том боломж юм.

-Өмнө нь манай улсаас ямар найрагчид оролцож байсан юм бол?

-Яруу найрагч Г.Мэнд-Ооёо, Г.Аюур­­зана, Дан.Нямаа, Ц.Бавуудорж, Б.Галсан­сүх, Б.Золбаяр, Ж.Гэн­дэн­дарам нар оролцож байсан юм билээ.

-Энэ жил та ганцаараа оролцох юм уу?     

-Эхэндээ ганцаараа явах гэж байсан ч Г.Мэнд-Ооёо ах маань хамт явахаар боллоо.

-Таныг тэнд очоод үзэсгэлэн гаргана гэж бичсэн байна лээ?

-Хэн тийм мэдээлэл тараасныг мэдэхгүй байна. Ямар ч үзэсгэлэн гаргахгүй. Зүгээр л шүлгээ уншчихаад ирнэ. Харин бидний бүтээлийг дэлхийн таван хэл дээр орчуулах юм билээ.

-Онгоцны тасалбараа захиалсан уу?

-Захиалчихсан, энэ сарын 21-нд Македон Улсын Струга хот руу ниснэ.