Ц.БАЯР

Хөгжлийн банк энэ сарын 26-ны байдлаар чанаргүй 67 зээлдэгчийн 3.2 их наяд багц зээлээс  994.7 тэрбум төгрөгийн эргэн төлөлт хийлгээд байна. Үүнээс 724.4 тэрбум төгрөг бэлэн мөнгөөр, 180.6 тэрбум төгрөгийг үнэт цаасаар, Өр барагдуулах үл хөдлөх хөрөнгөөр 89.7 тэрбум төгрөгийг барагдуулсан байна.  Хөгжлийн банк 2021 оны  сүүлээр  3.2 их наядын  зээлийн багцаас 1.8 их төгрөгийн зээл нь чанаргүй болсныг дүгнэж, тус чанаргүй зээлд нийт 765 тэрбум  төгрөгийн эрсдэлийн санг нэмж  байгуулах актыг тогтоож он солигдох өдрүүдэд хамгийн муу мэдээ болж олныг бухимдуулсан байдаг. Нийт 67 зээлдэгч хамрагдаж үүний 40 зээлдэгчийн зээл чанаргүйдэж   44.7 хувь  буюу 37 нь  хэвийн болон анхаарал хандуулах зээлийн ангилалд байсан. Чанаргүй зээлийн хэмжээ 1.8 их наяд төгрөг болж байв. Энэ нь тус банкны өөрийн хөрөнгийн хүрэлцээ хангалтгүй болж дампуурах шатанд орсон байсан. Өнөөдөр тус банкны гүйцэтгэх захирал Н.Мандуул эдийн засгийн сэтгүүлчдэд зээлийн эргэн төлөлтийн талаар мэдээлэл өгсөн юм.

Тус банк 2022 онд дээрхи чанаргүй активыг бууруулах үйл ажиллагааг авч   хэрэгжүүлсний үндсэн дээр өнөөдрийн байдлаар шүүхийн журмаар 37 зээлдэгчийн 1.6 их наяд төгрөгийг  хянуулж  232.5 тэрбум төгрөгийн зээлийн бүрэн хаасан байна. Түүнчлэн Иргэний шүүхийн ажиллагаа хийж буй 33 зээл, шүүхэд нэхэмжлэл гаргаж  хянан хэлэлцэж буй 17 хэрэг байгаа гэлээ.Тодруулбал, Шүүхийн шийдвэр эцэслэсэн  412.5 тэрбум төгрөгийн 10 зээлээс  энэ онд ес,  2019 онд нэг зээлийг тус тус хаажээ. Одоогоор  ШШГГ-т 200.7 тэрбум төгрөгийн 11 зээл шилжээд байгаа юм байна.  Шүүхийн бус  хялбаршуулсан журмаар таван зээлийг  шийдвэрлэхээр ажиллаж байгаа гэв. Үүнд 245.1 тэрбум төгрөгийн дүнтэй зээл эзэлж байна.

  АТГ-д 2022 онд 32 зээлд гомдол гаргаж хэрэг үүсгэснээс 20-ийг нь  Эрүүгийн хэрэг үүсгэн прокурорт  шилжүүлээд байгаа.  ӨБҮХХ-д шилжүүлэн авсан 89.7 тэрбум  төгрөгийн  зээл байна. Үүнээс энэ онд дөрвөн зээлийг нь банкинд үнэт цаасжуулан хүлээн авсан гэлээ. Шүүхэд нэхэмжлэл гаргаж хянан хэлэлцэж буй  993.8 тэрбум төгрөгийн 16 зээлээс 2019-2021 онд гурван  зээл байгаа бол 2022 онд 13 зээл хянагдаж байна.  Зээлийн багцын үлдэгдэл 2.2 их наяд төгрөг болжээ.