Б.БАЯРЖАВХЛАН

Өнгөрсөн долоо хоногт болсон эдийн засгийн үйл явдлыг тоймлон хүргэе.

 Чингис бондын өрийг төлж дуусгалаа

Одоогоос арван жилийн өмнө Засгийн газрын кодтой бондыг олон улсад анх удаа арилжаалж эхэлсэн. Чингис бонд нь 1990 оноос хойших Монголын Засгийн газрын анхны бонд юм. Тэгвэл 2012 онд арилжаалсан бондын үлдэгдэл болох 1.5 тэрбум ам.долларын өрийг бүрэн төлж дуусав.

Малайзад халал аргаар боловсруулсан мах экспортлохоор болов

Монгол-Малайзын бизнес уулзалт Куала-Лумпур хотноо өнгөрсөн лхагва гаригт болсон юм. Уулзалтад манай улсаас гадаад худалдаа, хүнс, сав баглаа боодол, барилга, хувцас үйлдвэрлэлийн салбарын 15 компанийн төлөөлөл, бизнес эрхлэгч нар болон Монголын үндэсний худалдаа аж үйлдвэрийн танхимын удирдлага оролцлоо. Энэ үеэр Малайзад халал аргаар боловсруулсан мах экспортлох хамтын ажиллагааны санамж бичигт гарын үсэг зурсан бөгөөд арьс шир, самар экспортлохоор болжээ. 

Хаан банк IPO зарласан гурав дах банк боллоо

Санхүүгийн зохицуулах хорооны ээлжит хуралдаанаар “Хаан банк” ХХК-ийн олон нийтэд гаргаж буй хувьцааг үнэт цаасны бүртгэлд бүртгэж, анхдагч зах зээлд арилжихыг зөвшөөрлөө. Ингэснээр Хаан банк нь банкны салбарын шинэчлэлийн хүрээнд олон нийтэд анх удаа хувьцаагаа санал болгож, нээлттэй хувьцаат компани болох ажиллагаагаа хэрэгжүүлж буй гурав дахь банк болж байна. Тодруулбал, УИХ-аас баталсан Банкны тухай хуулийн нэмэлт, өөрчлөлт, банк, санхүүгийн салбарт хэрэгжиж буй томоохон шинэчлэл амжилттай хэрэгжиж байгаагийн илрэл болж байна. “Хаан банк” ХХК нь банкны салбарын нийт үйл ажиллагааны 30 гаруй хувийг бүрдүүлдэг байна.

ОХУ-аас 253, БНХАУ-аас 267 вагон дизель түлш орж ирлээ

Тодорхой шалтгаануудын улмаас дизель түлш ховордоод байгаа. Тэгвэл УБТЗ хувь нийлүүлсэн нийгэмлэгээс дизель түлш татан авах ажиллагааг эрчимжүүлжээ. Дизелийн түлшний түгээлт, хүртээмжийг сайжруулах үүднээс тээвэрлэлт болон буулгалтын хугацааг 16 цагаар богиносгосон. Хилийн боомтоор орж ирсэн галт тэрэг Толгойт өртөөнд технологи хугацаагаараа 36 цаг дотор ирж нефтийн бүтээгдэхүүнээ буулгадаг байсныг 20 цаг болгон шуурхай горимоор ажиллаж байна. Мөн гаалийн байгууллага 24 цагаар ажиллаж байна. Өнөөдрийн байдлаар манай улсад БНХАУ-ын хилийн Эрээн боомтоос 267 вагон түлш орж ирснийг буулгажээ. Мөн Эрээнээс дахин 80 вагон ирж байгаа аж. Харин Замын-Үүд дээр 120 вагон түлшийг Монголын талд өгөхөөр хүлээгдэж байна. ОХУ-аас манай улсад нефтийн бүтээгдэхүүн ачсан 253 вагон ирснээс 220-г нь төмөр замын өртөөн дээр буулгаж байгаа мэдээлэл байна.

Эх сурвалж: “Зууны мэдээ” сонин

2022 ОНЫ АРВАНХОЁРДУГААР САРЫН 12. ДАВАА ГАРАГ. № 240 (6972)